ضحك ليه علينا الشيطان

أخويا يا بطرس يا حنا يا غالى يا يوسف يا عيسى يا أبو المجد عالى
أخويا يا أمجد يا عبد المسيح يا وليم يا مينا يا مرقص يا والى
أخويا يا كل اللى مؤمن بعيسى وموسى ومحمد يا مصرى يا غالى
تعالوا نسامح وننسى جراحنا تعالوا ننور سواد الليالى
تعالوا نقرب من الإنسانية وقلبى وقلوبكم من الحقد خالى
تعالوا نمهد جسور المودة ونور المحبة فى طريقنا يلالى
وقولوا لمدلين وماريا واليس وقولوا لمريم بنورك تعالى
وحطوا أيديكم على ايدين خديجة واشوف المحبة اللى عايشه فى خيالى
...
إخواتى يا أقباط يا نور العنين يا غاليين حقيقى على المسلمين
صلاتى وصلاتكم بتكمل بعيسى وعيسى ومحمد من المرسلين
ومريم تجلت فى آية كريمة فى قران منزل وبيه مؤمنين
وبينى وبينكم مودة وأخوة واحنا لمصر الحبيبة جناحين
تعالوا نزيح الشيطان من قلوبنا وننسى الوساوس فى دنيا ودين
تعالوا معايا نوحد صفوفنا ونبعد بروحنا عن المجرمين
تعالوا معايا ايديه فى أيديكم ونبقى بقلوبنا سوا مخلصين
تعالوا عشان مصر تفرح معانا دا مصر حزينة بقالها سنين
...
ضحك ليه علينا الشيطان يا حبايبى وليه خلى ليل الحبايب طويل
وليه الشيطان خد ولادنا فى طريقه وطريق الشيطان فيه معاصى وويل
وليه حط بزرة نزاع فى حياتنا وليه الشيطان يبقى قدوه ودليل
وليه ننسى كل المحبة اللى بينا وبستان حياتنا اللى طارح جميل
وننسى الإخاء اللى جمع قلوبنا وشعورنا اللى كان كل لحظة نبيل
نسينا إن مصر بتنده علينا وبتنادى أحمد معاه ميخائيل
تعالوا ننشف دموعها بأيدينا وبلاش تانى دمع عينيها يسيل
وهانموت بحسره إذا إحنا اتخاصمنا وهاتعيش سعيدة بلقانا الجميل