الوطن فينا وماحناش فيه وندعى إن ربنا يشفيه هاين عليكى إزاى يا عين تشوفيه وهوَّ قبل الدبح بِنشَّفيه الوطن فينا وسَّميه زى ما تسميه سميه ألم أو حِمل ليه نرميه أو حلم بيصالحِك وبتخاصميه منشور على حبل الأمل.. لِمِّيه ما فاضلشى فينا غير قصاصة وحبر والصبر بعد الصبر بعد الصبر اللى ناقصنا نشوف طابور عالقبر والناس يا ساقط يا ملحق فى الكرم والجبر فاكرينها كانت أحلى ما فينا فى ولعتنا.. بطَبِة إيد تطفينا فى شدتنا.. بِوِش رغيف تكفينا ونتخاصم.. توصلنا وترفينا اللى يفوتك خَد تأشيرة للجِتة وروحة تفضل تعسعس تحت ف الحتة يلحق ويرجع قبل ما تتلفه العتة وكل مرة يلاقيكى بتنقصى حتة الغربة فينا ولو عايشين فى دوارنا باع البهيمة وفى الساقية يدورنا لا ميه حلوة ولا لمبة تنورنا وغيرنا يشرب عسل ويحلَّى بمرارنا عينى يا بلدى حاتوَلِّف على الغربة حانسى الكوارع وطشت الفتة بالشوربة طفح المجارى ونرفع ديلنا للركبة ونغزى العين نلطخ عالحيطان كُبَّة الوطن فينا ولو رُحنا.. ولو جينا يا دين فى رقابنا.. يا سلاسل فى رجلينا ومهما الناس تلَّمَّعنا وتِجلينا مافيش غيرك من الغربة ينَّجينا يامصر فينا وحبك سر أوجاعنا تراودنا سوا شبعنا أو جعنا فى يومنا.. تطاردنا تصدعنا فى نومنا.. شابطة فى دراعنا