جاءنا الإحباط التالى

ليه أنت محبط من مجلس الشعب الجديد.. استنا بس.. فيه كتير من الفشلة عاوزينك تبرر لهم فشلهم بالتزوير وتردد أفكارهم العقيمة وبرامجهم الهشة على أنها الخلاص من أمراض مجتمعنا وأنهم الأمل الوحيد للبلد وكل من هو دونهم إما فاسدا أو عميلا أو رجعيا أو مخرباً وعاوزينك تكون مقتنع بكده طيب أنا راضى ذمتك أنت حاسس بيهم من حواليك لامس تواجدهم فى الشارع المصرى تعرف حتى برامجهم أو تعرف رموزهم غير الوجوه المحفوظة من قناة لأخرى لمجرد الشو الإعلامى والجعجعة الفارغة والعنترية الكدابة وكانوا فى المجلس وبكثرة شاور على إيجابية واحدة أو تغيير ملحوظ أو تأثير واضح فى المجتمع كان من نواتج برامجهم أو أفكارهم أو حتى تواجدهم داخل المجلس كل هدفهم دلوقتى إنهم يسودوا الصورة فى مستقبلك ويزرعوا فيك اليأس من التغيير من حد تانى غيرهم ويرسخوا جواك أن مؤسسات الدولة ضدك وضد مصلحة بلدك طيب إيه مصلحتهم وإن البلد من سيئ لأسوأ خيب ظنهم وأروى بذرة الأمل جواك وابدأ بنفسك وخرج طاقاتك وأبدع فى كل مجال أنت بتعمل فيه مهما كان بسيطا وبلاش تنتظر الحلول من الحكومة وبس ونتعلق كلنا فى حبالها الدايبة وبعدين هاتلى على مر التاريخ نواب أقنعوا كل الناس وأنت مش هتدعمه للأبد دول خمس سنين ممكن يقنعك أو يتغير ولو مش مقتنع إيه فى حياتك اليومية مقنع المواصلات الزحمة ومع ذلك بتركب وبتروح شغلك اللى ممكن متلقاش نفسك فيه ومع ذلك لازم تجتهد وتبدع فيه طب ليه وبتودى ولادك المدرسة اللى ممكن تكون مش مقتنع بنواتج تعلمها طب ليه لأن المدرسة بداية مش نهاية.. وبتشترى المنتج المصرى وأنت مش مقتنع بجودته طب ليه لأنك لازم تشجعه يتطور للأحسن وبدخلهم الجامعة وأنت عارف إنه ممكن مايتعينش لكن عنده الحد الأدنى لبناء نفسه وبتروح تطلع رخصة قيادة وتفشل ومع ذلك بتروح تانى وتالت طيب ليه علشان عندك أمل فى أن الواقع ده يتغير وهيتغير لأن دى سنة الحياة بس لازم تشارك فى تغيره ليه تستسلم للإحباط أنت أقوى منه لازم يخرج من جواك وتزرع مكانه الأمل فى بكره دى مش أحلام وردية ولا أوهام ده واقع أنت بتصنعه بإيدك أنت مش بإيد حد تانى أنت بتسمع اللى على مزاجك مظبوط طب ليه تسمع للى يعقدك ويوصلك لليأس من التغيير طب هو عاجز أنت أخبارك إيييييه....... إياك تشيل عارك على كتفك زيهم وتبكى عليه فى كل مكان وتشتكى ضعفك وتعلق فشلك على التزوير معاهم طيب أنا راضى ذمتك فيه أحزاب حقيقية فى مصر لهم تأثير أنت بتؤمن بقدرتهم على التغيير أدعم الثابت منهم فى معركته للتغير لأنه يستحق ثقتك وابعد عن الفاشل اللى ممكن يعديك بفشله كما يعدى الصحيح الأجربُ ومن الآخر لازم تشارك وتفاضل بعقلك بين الغث والثمين ولو الواقع صعب فكر فى مستقبل ولادك حاول تحسن مستقبلهم بمشاركتك فى تنمية بلدك فى مصنعك ومدرستك وشركتك وورشتك بإبداعك وفكرك أوروبا وأمريكا متحولوش للديمقراطية بين يوم وليله أوروبا شافت عصور ضلمة واتغيرت لأن عندهم الإصرار على تغيير واقعهم إحنا أقل منهم فى إيه على الأقل أنت ليك أساس حضارى واقف على أرض ثابتة والدليل أنك لما بتتغير كل منطقتك العربية بتتأثر وتتغير الكل حوليك مستنى تبدأ وأجدادك صنعوا التاريخ والحضارة بالفعل مش بالكلام تفتكر لو كانوا عرفوا اليأس والإحباط كانوا بنوا حضارة.