المُعلقة فى المجالس المُلفقة

يا ميت ألف مرحب بسيد قراره
رجع م الإجازة وطال انتظاره
وحشنا غتته ورزالة سيادته
وتشريعه اللى هايبد أ عواره
......
يا ميت ألف مرحب ومرحب كبير
بتسعة عتاولة بدرجة وزير
وباقى العتاولة خدوها مقاولة
وباعوا الغلابة فى سوق الحمير
......
يا ميت ألف مرحب هنا المجلسين
عليهم مهابة بتغزى العنين
عتاولة مجالس بتعرف توالس
وتعرف تبجح تقول حقى فين؟
......
يا ميت ألف مرحب ومليون يا حوستى
على اللى جرالى و زود مصيبتى
بسيد قراره اللى طال انتظاره
اللى قالوا مزوّر وبرضك هايفتى
......
يا ميت ألف مرحب ومليون يا غلبى
يا حسرة كبيرة وسكنت فى قلبى
بمجلس مماطل وتشريعه باطل
وهايجيب لى حاكم يزوّد مصايبى
......
يا ميت ألف مرحب ببشله وسلومه
اللى تم اختيارهم لشغل الحكومة
وخنجر و مطوة اللى فى كل خطوة
ها يعمل مع الناس خناقة وخصومة
......
يا ميت ألف مرحب بسيد قراره
منوّر مشرف بيوتنا بحماره
سكتنا كتير لما رفس وبعّر
وبكره وبعده هاتكوينا ناره
......
......
يا ميت ألف مرحب ومليون شوية
بمجلس عليه حُكم سبعين قضية
ومليون مخالفة لدماغه اللى ناشفة
وبكره هايفتى فى أم الوسية
......
يا ميت ألف مرحب بسيد أفندى
اللى سيفه فى قلبى وحشايا معدى
يزين المنصة ببسمة وقصة
وتكشيرة فيها يبان التحدى
......
فقيه والفقيه عنده كل الحلول
وفى كل فتوة بيقدر يقول
وافتى فى عيد الضحية يجوز
تضحى الغلابة بفلافل وفول
......
يا ميت ألف مرحب وتشكى لمين
حكومة بتلوى دراع التخين
بتقتل بأيدها وتعرف تكفن
وتمشى ف جنازة ورا المقتولين
......
يا ميت ألف مرحب ولسه كمان
ها تطلع علينا الكلاب والحيتان
ويطلع علينا اللى عامل مفتح
وهو فى حقيقته حرامى وجبان
......
......
يا ميت ألف مرحب بنور الكراسى
جزمهم ها تتحط فوق أم راسى
حماية وحصانة وسرقة وعفانة
وأطيب ما فيهم أبو قلب قاسى
......
......
يا ميت ألف مرحب بأهل التكيه
اللى نهبوا الأراضى شواطئ وميّه
وباين عليهم ولسه فى إيديهم
دليل قتل ليلى وجثة بهية
......
يا ميت ألف مرحب بقول غصب عنى
عشان كل حاجة هايخدوها منى
بعلم اللى شايف وفاهم وعارف
وخلى حياتى بأفعاله بنى
......
يا ميت ألف مرحب بمجلس جميل
ملهشى فى بطلان وجوده مثيل
موافقة ومعارضة بنفس اللسان
ونفس الضمير اللى قاتل قتيل
......
يا ميت ألف مرحب بوالى الجباية
اللى كفه معلم فى جيبى وقفايا
أخدنى ورمانى طعام للحيتان
وكرباجه ماشى يطرقع ورايا