النجوم يتضامنون مع تامر حسنى بعد السخرية من صورته.. مى كساب وخالد تاج الدين ينشران صورهما أيام المراهقة.. شريف منير: هتخلينى أنزل بصورى..زوجته تدعمه: فخورة بيك.. ووفاء عامر و انتصار: شكرا للولد الصغير

أثارت التدوينة المؤثرة للنجم تامر حسنى، الذى نشر خلالها صورته المتداولة موضحا فترة طفولته واعترافه أنه كان لا يمتلك وقتها المال لشراء الملابس ولا أب يصرف عليه، لكن إصراره صنع منه الرجل والفنان الذى وصل له، حالة واسعة من الاهتمام وردود فعل عبر مواقع التواصل الاجتماعى، وأعلن عدد كبير من المشاهير المصريين تضامنهم معه، مؤكدين إعجابهم به وبقصة كفاحه.
وكان على رأس المتضامنين معه الفنانة مى كساب، التى نشرت صورة قديمة لها معلقة عليها: "تضامنا مع طموره ولا تزعل نفسك أبدا يا تامر يا حسنى كل واحد مننا عنده صورة وهو صغير شكله فيها لا يسر عدو ولا حبيب واحنا حريين".
وتابعت مى: "المهم على رأيك الولد الصغير بقى راجل وإنسان وفنان كلنا بنتشرف بيه اسمه #تامر_حسنى أنا طبعا فى الصورة دى كنت شايفة نفسى الشحرورة ضاربة الأكسجين وضاربة البودرة السمر كيك وشايفة نفسى فاتنة طنطا".


ومثلما فعلت مى كساب، نشر الملحن خالد تاج الدين صورة معلقا عليها: "صورك القديمة مش عيب ولا ماضى وراح ده تعب وشقا عمر ورحلة كفاح.. العيب فى النفوس المريضة واللى عيارها فلت زمان أو حتى دلوقتى.. لسه أشكالهم غلط".

خالد تاج الدين

وكذلك النجم شريف منير قال تعليقا على رد تامر على منتقديه: "حتخلينى أنزل بصورى أنا كمان يا تامر.. على العموم اللى بيترّيق يبقى يطلع صوره القديمة ويشوف نفسه كان عامل إزاى.. أنا فخور بيك وبحبك.. لأنك حقيقى راجل وجوّاك أبيض زى الفل.. عشان كدة ربنا بيكرمك".
أما زوجته بسمة بوسيل فقد أعلنت فخرها به قائلة: ربنا يحميك ويخليك لكل الناس اللى بتحبك أنا فخورة بيك جدا، أنت قدوة يقتدى بها فى كل حاجة.

تعليق بسمة بوسيل

وقالت المطربة الشابة إيناس عز الدين: "عمر ما كان عيب إن الإنسان يطور نفسه ويحسن من نفسه ومن عيوبه لأن ما حدش خالى من العيوب وكلنا فينا بلاوى ما يعلم بيها إلا ربنا، وبنحسن من نفسنا سواء معانا فلوس أو لا".

متضامنون مع تامر

كما كتب الملحن عمرو مصطفى رغم خلافه الدائم مع الفنان تامر حسنى عبر حسابه على "فيس بوك": "بالنسبة للناس اللى بتتداول صور لمغنين ومطربات وممثلات وهما صغيرين وتتريق وتضحك على شكلهم!.. حاجة غريبة فعلا!.. مين شكله فى سنوات المراهقة ما كانش ساعات يضحك ؟!!".

تعليق عمرو مصطفى

وتابع: "لو حد كان تخين وخس وبقى شكله أحلى.. برافو!.. لو حد كانت إمكانياته بسيطة ولما ربنا رزقه عرف يحسّن من نفسه ويبقى شكله أحلى وعرفت تلبس كويس أو تحط مكياج كويس.. برافو!.. لو واحدة كان شعرها وحش وده خلقه ربنا والنهاردة ماحدش بقى شعره وحش.. إيه المشكلة إن الواحد يحب يكون شكله أحسن وأحلى وأرفع وأشيك؟!.. برافو عليهم وعيب عليكم!!.. الله جميل يحب الجمال".

كما علق بعض الفنانين على صفحة تامر حسنى، حيث قال الفنان أمير صلاح الدين: "حقك.. مجهودك.. حلمك"، وقالت الفنانة هبة عبد الغنى: "تستاهل حب الناس وتقديرهم ليك يا محترم"، وكذلك الفنانة وفاء عامر علقت قائلة: "كلامك صح.. وشكرا للولد الصغير".
وعلق الإعلامى مروان يونس قائلا: "والله أنت محترم وقصة نجاحك تحترم"، وقال الفنان الشاب محمد شاهين: "أنت فخر لأى حد"، وكتبت الفنانة انتصار: "راجل الولد الصغير"، ووجه خالد الغندور نصيحة له قائلا: "لا تنظر لهولاء ودائماً انظر أنك ناجح وإلى الأمام يا تامر".
فيما اعترف الكاتب الساخر هشام منصور بسخريته من الصور مبديا اعتذاره لتامر قائلا: "أنا من أكتر الناس اللى اتريقوا عليك ومبسوط باللى إنت كاتبه، فرق الصورتين ده رحلة ماحدش هيفهمها غير اللى تعب فى حياته، عاش يا تامر، وحتة ماعنديش حد يشتريلى حاجة دى عارفها كويس ووجعتنى، ربنا يزيدك ويسعدك وماينفعش تبقى أى حاجة غير فخور بالصورة دى".


ورد المطرب تامر حسنى أمس الاثنين، على منتقدى صورته فى فترة المراهقة، مؤكدًا أنه كان يقلد المشاهير فى أفلامهم وكانت هذه الموضة المنتشرة فى تلك الأيام، مشددًا على أنه لم يملك المال لشراء الملابس ولا أب يصرف عليه، لكن إصراره صنع منه راجل وفنان.
وكتب تامر عبر صفحته الرسمية: "لمن يهمه الأمر، من يومين نزلت صورة ليا وأنا صغير وشغلت ناس كتير وفضلوا يتريقوا على الصورة، فى الحقيقة إنى فى الوقت ده فعلاً كنت بحاول أقلد المشاهير فى صورهم وأفلامهم وحركاتهم، وبغض النظر عن أنه فى الوقت ده كانت الموضات شبه كدة، أنا بقول شبه كدة لأنى كنت ولد صغير معندوش فلوس نهائى يشترى لنفسه حاجة غالية ولا عنده أب يشتريله حاجه أصلاً".