العنف وراء معظم الجرائم الزوجية.. ماذا تفعل لو ضربتك مراتك بالقلم؟ ماذا تفعلين لو "صدغك جوزك على وجهك"؟

"تلطيش الأقلام" بين الأزواج أحد الأسباب الرئيسية فى المشكلات الزوجية والتى أحياناً ما تنتهى بجريمة قد تفقد الزوجة فيها حياتها ثمناً لكرامة الزوج التى أهينت، أو يتحول الزوج إلى أشلاء صغيرة داخل كيس أسود تهدئة لغل زوجة بعد "تصدغيها بقلمين سخنين ".
حوار ساخن قد يدور بين زوجين ربما بسبب الغيرة.. أو مصروف البيت.. أو دوشة العيال.. أو أى سبب وقد ينتهى بلطشة قلم على أى وجهة أى منهما.
كيف ستتصرف أو تتصرفى إذا ما حدث معك هذا.. سؤال طرحناه على البعض وهم فى لحظة هدؤ وبعيداً عن ميدان القتال الزوجى.
"علاء صبرى" سائق تاكسى يقول "لوضربتنى مراتى بالقلم أطلقها وبعدين اسألها انت ضربتينى ليه وبعدها اشوف حا أعمل ايه ومش حروحها بيت أبوها بس لكن حا اديها علقه أخليها تفكر ميت مره بعد كده قبل ما تقول مجرد كلمه ممكن مش تزعلنى أو تزعجنى".
"محمد عبد الله " موظف بشركة خاصة قال "طبعا من المستحيل مراتى تتجرأ وتعمل كده مش بس عشان بتحترمنى.. كمان عشان فيه بيننا مودة والأهم الرحمة اللى ربنا قال عليها، ولو ده فرضاً حصل مش ممكن اقتلها غير فى حالة فقدانى للعقل ولو للحظات".
"محمود عبد الجليل" سائق مقطورة لو مراتى عملت كده وأنا فى وقتها كنت لسه محتفظ بعقلى هروحها لبيت أبوها وأقول له ربى بنتك ولما تربيها رجعها لى ولو اتكررت تانى هكسرهالك وهطلقها".
"هدير ماهر" لو حصل وأطاول جوزى عليا وضربنى بالقلم أو قالى كلمة تزعلنى مش هضربه بس دنا هشرحه وهطلع عينه وممكن أحبسه".
"محمد يوسف" عامل غسيل سيارات "لو زوجتى ضربتنى بالقلم اخاصمها واسألها ضربتينى ليه لانى ممكن اكون زعلتها وبعض الرجالة برضه بتنرفز زوجاتهم".
"شروق جبر" موظفه ببنك "لو ضربنى زوجى حاسبله البيت واروح عند ولدى أو حد من اخواتى وبعدها أهلى يجيبولى حقى منه ولو استمر على أسلوبه مينفعش أعيش معاه".
"محمد الصاوى" تاجر منظفات "مش ممكن مراتى تضربنى بالقلم لأنى مش متجوز واحدة من الشارع وليها اهل هيترد عليهم ولو حصل وضربتنى حاسبلها البيت وامشى قبل مافقد اعصابى والتدين سواء كان اسلامياً او مسيحياً هو اللى بيخلى الناس تخاف من ربنا قبل الأقدام على ضرب الزوج لزوجته أو ضرب الزوجة لزوجها".
"عليا أشرف" ربة منزل "لو ضربنى زوجى بالقلم حاضربه نفس القلم وحا أزله فى محكمة الاسرة وممكن أشتمه أمام الناس فى الشارع عشان أبهدله وأقل من كرامته فى المنطقة اللى ساكنين فيها وعلى حسب شخصية الراجل".
"وليد سليمان"، سايس جراج، "زوجتى تضربنى بالقلم طبعا حاكون فى ذهول وبعدها ممكن أرميها من الشباك أو حاطلقها وأروحها لبيت أبوها والزوج الذى تستطيع زوجتة تضربه بقلم هو زوج غير محترم لاشخصية لديه".
"سعيد عبدالمنعم" طباخ "حا ضربها 60 قلم ومدخلهاش البيت تانى وأمشيها بدون حقوقها وتدوخ ورايه فى محاكم الأسرة اللى بيقولوا عليها".
"صالح إبراهيم" بائع تمر"فى الصعيد ووحده تضرب جوزها بلقم حادفنها وهيه حيه أو أضربها بالنار لأن الصعايدة دمهم حامى ميقبلوش وحده تضرب راجل".
"على عبد الرازق" موظف "ممكن فعلا الواحد يضرب زوجته لو أهانت رجولته وإحنا ممكن فعلا نقتل لو الموضوع جه على رجولتنا.. والعيب على الست من البداية اللى استفزت الراجل وعايرته بأى شىء".