دموع زهرة الخشخاش

انزف دمعك وابكى يا فان
دا احنا الفن معانا اتهان
لمَّا تراثنا يضيع من إيدنا
عار وفضيحة ف كل مكان
فين الكاميرا تراقب ترصد؟
فين إنذار بجرس رنان؟
فين الحارس يرعى العهدة؟
يمكن غايب كان نعسان
ولا دى حاجة مش مفهومة؟
أسرار عفاريت وحركة جان
افتح مندل تلقى مكانها
واسأل عنها قارئ فنجان
زهرة خشخاش تجيب ملايين
سرقها يا سيدى عاشق ولهان
قالوا اتسرقت مرة ورجعت
يبقى هتظهر تانى وتبان
ولا سرقها حرامى متمكن
دارس وفاهم وضع مكان
فاهم إمتى إزاى هينفذ
واحنا ف غفلة مع التوهان
خايفين بكرا يشيلوا هرمنا
وبرج الجيزة يصبح كان
متاحفنا مش قادرين نحميها
يبقى النيل إزاى يتصان؟!
يمكن نلقى الميه اتشفطت
مواسير سرية تروح خزان
وامكن ياخدوا كحل عيونا
سرقوا الفرحة سابوا الأحزان
مش عارفين الزهرة نصونها
يبقى إزاى هنصون بستان
لما تراثنا معانا يتبهدل
يبقى اختل حقيقى ميزان
صونوا تراثنا بشكل مقدس
دا احنا حاضرنا يجيب نسيان
انزف دمعك وابكى يافان
دا احنا الفن معانا اتهان