"المرور في القاهرة أصعب من صعود الفضاء"، هكذا وصفت رائدة الفضاء ماري آلان ويبر أزمة المرور في مصر ، و يعتبر "الميكروباص" أكثر وسيلة مواصلات يستخدمها المصريون بشكل دائم ، وركوب الميكروباص فى مصر ليس بالمهمة السهلة تماما حيث يتطلب قدرات بدنية ونفسية خاصة. لذلك إذا كنت من هؤلاء الذين يعتمدون على الميكروباص كوسيلة انتقال في مصر، فعليك التعرف على أهم قواعد ركوبه و ذلك عبر الخبرات اليومية التى تداولها رواد موقع التواصل الاجتماعى "فيس بوك" فقد قواعد الميكروباص الثلاثون في مصر، ولم تخلو القواعد من خفة دم المصريين و هى : 1. السواق دايما على حق وصح . 2. السواق هينزلك مكان ما هو عايز مش مكان ما أنت نازل . 3. حتى لو السواق موقفش من أول ما طلع ممكن لو قولتله على جنب ياسطى هيقولك ما أحنا كنا لسه واقفين يا بيه عادى جدا . 4. دايما الكرسى اللى جنب السواق محجوز حتى لو محدش هيقعد فيه . 5. الكرسى اللى جنب السواق هيبقى فاضى فجاءة لو قولتله خلاص هأخد الاتنين. 6. السواق معندوش مشكلة إنه يقف فى نص الشارع عشان ينزل حد . 7. السواق هيبقى عنده مشكله لو حد قدامه هو اللى وقف ينزل حد فى نص الطريق وهيقوله اركن على جنبه يا ( حط الشتيمة اللى أنت شايفها ) . 8. السواق مش هينزلك فى مكانك لو أنت ولد إلا لما تقوله 4 مرات على الأقل . 9. السواق ممكن ينزلك على باب البيت لو انتى بنت عادى جدا . 10. السواق لما تيجى تركب ويقولك الكنبة الأخيرة فاضية وتقوله بس انا نازل قريب يقولك اركب بس وهبقى انزلك انا ولما تيجى تنزل هتكره نفسك بسبب رخامة السواق ف متركبش ورا من الأول . 11. السواق معهوش الربع جنيه الباقى ودايما هيبقالك . 12. أوعى تسأل السواق على مكان ويقولك أركب وأنا هنزلك عنده وتأمن له هينسى وممكن ياخدك لاخر الخط عادى ويقولك يوه ده انا نسيتك مقولتش ليه بس يا بيه (على اساس انك لو كنت عارف المكان كنت هتسئله) 13. السواق يشغل اللى على مزاجه واللى يعجبه ومش هيوطى الصوت لو عملت ايه . 14. لو لقدر الله ركبت ميكروباص وهيطلع دائرى او محور (او اى طريق سريع ) تأكد انك هتلعب لعبة عربيات التصادم أو قطر الموت اللى فى الملاهى وأنت قاعد فى مكانك فأمسك كويس بقا من دلوقت . 15. سواق الميكروباص ليه الحق انه يمشى من اى طريق هو عايزه. 16. لو رايح مشوار اعرف مواصلاته قبل ما تنزل من بيتك واوعى تسئل سواق ميكروباص (عادى بالنسباله انه يقولك اركب معايا وهنزلك تمشى حتة صغيرة وتكون الحتة دى 2 كيلو مثلا معندوش اى مشكلة فى ده ) 17. لو problem solving skill عندك عالية لم الاجرة غير كده هتلبس لبسه وحشة اوى . 18. اوعى تقعد فى الكنبة اللى ورا السواق لو رجلك طويلة هتتكدر تكديرة وحشة 19. شباك الميكروباص حلو اوى على فكرة 20. افضل مكان تقعد فيه تانى وتالت كنبة فى الميكروباص لو هو 4 كنبات 21. اوعى تقعد على الكرسى القلاب لو نازل بعيد 22. لو سواق الميكروباص ماشى فى البطئ او قلب نور او زمر شاورهله غير كده هو ولا كانك شايفك . 23. حاول تتعرف على اشارات السواقين الدارجة هتريحك كتير جدا (زى دقى مثلا او الهرم تجنيد) 24. الميكروباص بيروح كل حتة فى القاهرة وأسرع من الاتوبيس دايما 25. نزل "اركب ايه" على موبايلك علشان تعرف تركب انهي ميكروباص احسن وأسرع من هنا 26. لو قاعد جنب الباب هتفتحو و تقفلو لباقي الركاب اللي داخلين و خارجين. 27. قواعد المرور بالنسبة للسواق دي مجرد ارشادات و تسقط منها صفة الالزاميه. 28. لو لقيت السواق مشغل اغاني اجنبي اعرف انك مخطوف. 29. متطلعش موبايلك جوه الميكروباص عشان بيبقى ملكية عامة وبيبقى على الأقل 4 مركزين في الNews Feed بتاعة فيسبوكك مش انت لوحدك. 30. و اخيراً .. السواق مش بيقف .. الميكروباص بيفضل ماشي و لما سيادتك تيجي تنزل بيهدي بس .. و انت و لياقتك بقي. موضوعات متعلقة.. - صحافة المواطن: حادث تصادم بين سيارة نقل وميكروباص على طريق بلبيس العاشر
