بسام وإيمان حكاية حب على العجلة.. انتهت بخطوبة فى "مارثون"

بعيداً عن الأجواء التقليدية وأصوات الزغاريد والأغانى الصاخبة، التى تكون مصاحبة للمناسبات والأفراح، قرر إيمان وبسام الاحتفال بخطوبتهم على طريقتهم الخاصة جداً، فكان استعدادهم للحفل أبعد ما يكون عن الفستان والبذلة، مكتفين ب"تيشيرت" وعجلة.
بين الأصدقاء وحرصاً على مكانة فريق "جانج بايك" فى قلوبهم، خاصة أن فعالياته الأسبوعية كانت شاهدة على مراحل حبهما، حتى اتفقوا على الخطوبة، وقرروا أن تكون خطوبتهم ضمن فعاليات مارثون العجل الذى أقيم صباح اليوم من كوبرى قصر النيل وحتى جزيرة المعادى.
وعن قصة بسام وإيمان تحكى رويدا يحيى المسئول الإعلامى لفريق "جانج بايك" ل اليوم السابع وتقول "بسام عنده 27 وبيشتغل مصور فوتغرافيا وإيمان عندها 21 فى كلية فنون تطبيقية، يعرفوا بعض من سنتين، وكانوا بيحبوا أنشطة العجل، ولما عملنا فريق جانج تيم جابها معانا، وبقى بيشوفها كل أسبوع واتفقوا على الخطوبة، وقرروا إنها تكون بينا لأننا فى الأصل فريق من الأصدقاء وكلنا عارفين بعض".
وعن استعدادات الخطوبة قالت "أنا ومروة زميلتى قررنا نفاجئهم، كل اللى كانوا يعرفوه إننا هنعلن خطوبتهم فى المارثون وهم هيمشوا قدام بالعجل وهم لابسين التيشيرت الخاص بالتيم، والصبح بدرى روحنا وزينا العجل بالبلالين، وعملنا تل طرحة الخطوبة لأيمان بنفس لون تيشيرت بسام، وعلمنا ياقطة "Just Engaged" وعملنالهم مفاجأة، وطبعا إيمان لما جت وشافت الحاجة اتخضت وفضلت مذبهلة شوية، وبسام مكنش مصدق".
وتابعت: "الناس فى الشارع كانوا مخضوضين، وكانوا بيبصوا عليهم وطبعاً مندهشين وكأنهم بيقولوا يعنى مش كفاية سايقين عجل كمان بتعملوا خطوبة على العجل، لأن الشكل كان ملفت جداً"، وأضافت "أول ما وصلنا جزيرة المعادى نزلنا ولبسوا الدبل وكان قرايبهم وإخواتهم موجودين وكل واحد على العجلة، لكن طبعا الأب والأم والناس الكبيرة مقدرتش تيجى وتسوق العجل".
واختتمت رويدا حديثها: "الحمد لله ان التيم بتاعنا أسسناه من 5 شهور بس، وليه فعاليات حلوة ومفيدة، والبنات بتتفاعل معاه جداً خاصة إن التيم ليدر بتاعته بنت، والولاد كمان بيتفاعلوا معانا، وإحنا هدفنا نوصل للناس إن أى حد ممكن يعمل أى حاجة وهو على العجلة، حتى البنات اللى بتلبس فساتين ممكن تسوق عجل وفيه أنواع عجل مخصصة لكدة".
بسام وإيمان يحتفلان بخطوبتهما خلال مارثون العجل
إيمان تتفاجأ بالعجل والزينة وترتدى طرحة الخطوبة
العروس تستعد لانطلاق المارثون
الفرحة تظهر على وجه إيمان
بسام وإيمان على العجل
جانب من المارثون
العروسان يقودان المارثون