بالفيديو.. جلسات "باديكير" و"مانيكير" و"جاكوزى" فى حضانة بالتجمع الخامس

تداول نشطاء مواقع التواصل الاجتماعى فى الفترة الأخيرة عددا من الصور لمجموعة من الصغيرات الجميلات فى خلال حضورهن جلسات باديكير ومانيكير بإحدى حضانات الأطفال بالتجمع الخامس والتى أثارت ردود فعل مختلفة بين مؤيدين ومعارضين للفكرة بسبب كونها لا تناسب الأطفال وآخرين مشككين فى كون الصور لحضانة فى مصر.
كاميرا "فيديو 7′′ تقصت الحقيقة والتقت بالسيدة سحر مصطفى صاحبة الحضانة والتى تحدثت عن فكرة ال"spa day" قائلة: "أنا فكرت فى تأسيس الحضانة بسبب إنى تعبت جداً فى البحث عن حضانة مميزة لأبنى تقدر تعلمه حاجات تفيده فى حياته بجانب تعليمه للدراسة ومن هنا فكرت فى تأسيس حضانة مميزة أعلم فيها الأطفال بعض القواعد زى يوم المرور وده لتعليم الأطفال قواعد المرور واتباع تعليمات إشارة المرور ويوم الرياضة لممارسة الرياضة المحببة للأطفال ويوم ال"spa day" وده بهدف تعليم البنات الاهتمام بالنظافة الشخصية.
وأضافت: "فكرة ال"spa day" دى ابتكارنا إحنا ومش مستوردة من أى دولة أجنبية وما افتكرش إن فيه حضانة نفذتها وبدأنا فيها من السنة إللى فاتت وبنفذها شهرياً وقبل بدء اليوم بأسبوع بنبلغ الأطفال وأولياء الأمور باليوم ده وإنهم يكونوا مجهزين أدواتهم معاهم وبالفعل الأطفال بتكون مستعدة وبتستنى اليوم ده من شهر لشهر وبنعلمهم إزاى يهتموا بنظافة شعرهم وضوافرهم وملابسهم وكمان بيحضروا جلسات جاكوزى وباديكير ومانيكير".
وعن رد فعل أولياء الأمور على ال"spa day" قالت سحر: "الأمهات سعيدة جداً باليوم ده وبتقولى إن البنات اتعلموا إنهم يهتموا بنظافتهم الشخصية أكتر لكن فيه ناس مؤيدة للفكرة وناس معارضة للفكرة عشان أطفال بالعكس المفروض الأطفال يتعلموا فى السن ده أساسيات يطبقوها فى حياتهم بعدين يعنى لما أعلم الأطفال يهتموا بالنظافة هيطلعوا مش بيرموا ورق فى الشارع وبالنسبة لعمل جلسات باديكير ووضع مانيكير للبنات فيه لعب للأطفال بيكون فيها مانيكير وبعدين دى غريزة عند البنات إنها تهتم بنظافتها وتكون أنيقة".
وتحدثت سحر عن الأفكار الجديدة التى ستطبقها الحضانة فتقول: "كل فترة بقعد أنا وفريق الحضانة زى ميس لطيفة وهى من الناس إللى بتشاركنى فكريا وإنجى وهدير بنفكر إحنا محتاجين نعلم إيه للأطفال الفترة الجاية وبنخصص له يوم وأى حاجة الأطفال بيحبوها بنعملها وبنشترك معاهم فيها".