مسحراتى اليوم السابع.. الهتيف

مسحراتى..
بعد الصلاةِ على خير البرية
طه رسول الإنسانية
اللى الغمامة
حطَّت على راسه بسلامة
وجابت النسمة طرية
إصحى يا زينب يا فوقية
يا رزق يا أسطى عطية
إصحى يا سيد شفيق.
...............
طليت عليَّا
لقيتنى عيل برىء
جوة المظاهرة شفتنى
باهتف جرىء
تنزل على راسى العصاية بغرزتين
شهور وعدت يا مبجل.. قول سنين
ولسه ما اتغيرش شئ.
إصحى يا سيد شفيق.
.................
شفتهم فى "رُد قلبى"
يهتفوا للجمهورية
لما عبواحد نطق
"تحيا مصر" ماهيش وسية
شفتهم فى تسعة يونيو
يهتفوا ضد التنحى
يرجع الريس يضحى..
والجميع يطلع يبارك.
شفتهم فى خلِّى بالك
يشتموا فى البت "زوزو"
من ساعتها لقيتنى طالع
صوت جهورى وجسم فارع
مرة أهتف ضد "أهلى"
مرة أكون ضد "الزمالك"
كل ما يقولوا مظاهرة
أبقى جوَّه الزحمة سالك
أجرى وأشعلها حريق.
إصحى يا سيد شفيق.
.................
ثورجى راكبها دايماً بالهتاف
قالوا صوتى حلو أطعم م الخشاف
لو فى يوم تسأل عليَّا
بص دايماً ع الكتاف
هتلاقينى جوّه كادر ف قلب صورة
ماتش كورة.. أو محاكمة لواد جاسوس
الحكاية مش فلوس.. ولا يحزنون
إنما غاوى وب انقَّط بالزعيق.
إصحى يا سيد شفيق.
..................
مش باقولك من سنين
بح صوتى وشعرى شاب
ياما قالوا وكتبوا عنى
طرت ومشيت ع السحاب
بس فقت لقيتنى واقف
مطرحى مرعوب وخايف
والمصيبة إنى عارف
إنى محبوس مش طليق.
إصحى يا سيد شفيق.
مسحرااااااتى..
مسحرااااااتى..
مسحرااااااتى.