سألنا الشباب.. عاوز كام عشان تتجوز؟.. فردوا "محتاجين كتير.. ومش عارفين نوفر حتى حق الشبكة".. محمد: "أبو خطبتى فسخ الخطوبة عشان مش عارف أكون نفسى.. ومش لاقى حتى حق أوضة نوم"

عاوز كام عشان تتجوز؟ هذا هو نص السؤال الذى طرحناه على مجموعة من الشباب الذين تجاوز بعضهم عُمر الثلاثين، وعلى الرغم من أن الجميع على علم بأن هناك أزمة كبيرة فيما يتعلق بقضية الزواج فى مصر، وأن البطالة وغلاء الأسعار ومغالاة الأهالى كانت أسباب كافية لزيادة هذه الأزمة، إلا أن الشباب ما زال يحاول أن يجد مخرجًا من هذه الدائرة السوداء، ويبحث عن حل لمشكلته بأشكال وطرق مختلفة، إلا أن البعض يواجه الأزمة ذاتها والأموال عائق كبير فى سبيل تحقيق حلم الزواج، فمجرد أن طرحنا عليهم هذا السؤال، كانت معظم الردود مُحبطة بعض الشىء، وعلى الرغم من أن بعضها تغلف بالكوميديا والسخرية إلا أنها كانت تعبر فى حقيقتها عن أزمة حقيقة ومأساة يعيشها هؤلاء الشباب.
محمد منصور، شاب ثلاثينى، يحكى عن تجربته مع أزمة الزواج فى مصر قائلاً: "أنا خطبت لمدة 3 سنين بعد ما تعبت ولفيت ودخت قدرت أخيرًا أجمع حق الشبكة اللى حددها أهل خطيبتى السابقة، ولأن الوضع مش مستقر والشغل مش مساعد خصوصًا إنى كنت بشتغل مندوب أدوية فى شركة خاصة، فمقدرتش خلال الفترة دى أجمع فلوس الجواز، وده اللى خلى والدها يفسخ الخطوبة، وقالى روح شوف حد يتحملك 10 سنين، ولحد دلوقتى مش لاقى حل للمشكلة دى وعارف إنها هتضيع من إيدى خلاص".
أما كريم مصطفى يرد على السؤال قائلاً: "أنا محتاج مش أقل من 100 ألف جنيه عشان أعرف أتجوز فى الزمن ده، مفيش حد بيرحم أى ولى أمر عايز يأمن مستقبل بنته، والأسعار غالية وكل حاجة فى السما، عشان بس أعمل العادى أجيب عفش وشبكة وشوية الحاجات ديه مش أقل من 100 ألف جنيه، ده غير إنى هأجر شقة، يعنى عريس نص النص زى ما الناس بتقول، لأن دلوقتى العريس التمام هو اللى يكون جاهز بالشقة".
أما حسين السيد، بالغ من العُمر 27 عامًا: "أنا محتاج كتير بس مش لاقى أى فرصة إنى استثمر نفسى، أنا بحاول أشتغل وأحوش، بس الحياة مقفلة فى وشى ومش عارف أوفر قرش للزمن، وكل حاجة بفلوس، وعشان بس أتقدم لأى بنت على الأقل لازم يكون معايا مش أقل من 7 آلاف جنيه عشان أخطبها مش أجيب شبكة، شكلى كده هعيش من غير جواز أرخص".
موضوعات متعلقة..
- زمن "الجواز الجميل" .. 10 فساتين زفاف من دولاب ماما رجعت موضة
- فى يومها العالمى .. السعادة عند المصريين يعنى عربيات وفلوس وجواز ببلاش