بالفيديو..خالد صلاح فى وصلة نقد لاذع ضد توفيق عكاشة: أكاذيبه السياسية كترت وتجاوز الأدب مع الصحفيين..حول قناته لمشتمة وأمثاله يشوهون البرلمان.. روائيون وأدباء فى السجن وهو بره رغم إنه "شاتم مصر كلها"

فى وصلة من النقد اللاذع ،استنكر الكاتب الصحفى خالد صلاح، رئيس مجلس إدارة وتحرير "اليوم السابع"، تصرفات النائب توفيق عكاشة، متسائلا عما يفعله داخل البرلمان، مؤكدا أن "عكاشة" كذب على مصر بأكملها عندما قال إنه سيستقيل من المجلس، موجها حديثه للنائب:"أنت مش قولت هتستقيل يا توفيق؟، وهعمل توكيل لأمى وهى هتروح تبيع الأرض وهسافر وبعدين هتبيع الأرض وهتحولى الفلوس، أنت فاضى للشتيمه ليه؟، يعنى فين الانضباط دا أنت فى حوار سابق معانا كنت كويس وقلنا يمكن ربنا هداه ووصل إلى رشد سياسى ".
ما يفعله "عكاشة" حاليا يساهم فى هدم البرلمان، بسبب كذبه سياسًيا
وقال خالد صلاح، ببرنامج "آخر النهار" الذي يذاع على فضائية النهار، "إن ما يفعله "عكاشة" حاليا يساهم فى هدم البرلمان، بسبب كذبه سياسًيا عندما صرح باستقالته وتراجع، وقال أنا معايا النواب وهترشح على رئاسة المجلس وفشل، ولما فشل قال بيقطعوا عليا النور، وقال هدعى 300 نائب أيام انتخابات رئيس البرلمان فذهب إليه 3 نواب.. وال3 كانوا قاعدين بالصدفة ونفوا بعد كده إنهم كانوا رايحين له، والتلاتة دول كانوا موجودين فى البهو الفرعونى فراح سحب كرسى وقعد جنبهم وقال هشرب معاهم شاى وقت دعوته لانتخابه رئيساً للمجلس، ولما الخبر اتنشر قال إن وزير الشئون القانونية وأمين عام مجلس النواب قطعوا عليا النور ومنعوا النواب من الدخول "، مستنكرا:"ما هذا الهلس السياسى ده؟، أية الهوس الغريب اللى شايفينه ده؟ لية كده دا احنا كنا نظنك انك خلاص ربنا هداك".
لما اتزنق طالب بانتخابات رئاسية علشان ينطح فى الرئيس السيسى
وأوضح رئيس مجلس إدارة وتحرير "اليوم السابع"، أن النائب البرلمانى توفيق عكاشة لم يستطع اثبات ذاته سياسيًا، أو يقترح شىء أو حتى يدير محطته الفضائية اقتصاديًا، مضيفا:"كل ما يزعل يطالب بانتخابات رئاسية مبكرة يعنى هو أنت الناس منتخبتكش فى البرلمان وأنت مش عارف تثبت ذاتك سياسياً ولا عارف تقترح حاجة ولا عارف تدير محطتك اقتصادياً، ولما تتزنق داير مشتمة فى الناس وتقول انتخابات رئاسية مبكرة علشان تنطح فى الرئيس السيسى، وأنت مفكر إن ده هيرجعلك أى مصداقية وسط كل هذه الأكاذيب السياسية التى رددتها على الناس وفى البرلمان، لية كل ده لية الفوضى دى"، وتابع:"أنا لو من نبروه كنت شعرت بالخذلان لو انتخبتك، لأنك قولت حاجة ورحت عملت حاجة تانية، تروح تتخانق مع ضباط شرطة وصحفيين صغيرين وتشتم الناس فى محطتك".
روائيون وأدباء بيتسجنوا وتوفيق بره بيشتم مصر كلها
وتابع صلاح: "دلوقتى مصر بتسجن روائيين.. انت بتقول قلالات أدب يتسجنوا، طيب فاطمة ناعوت عليها حكم، إسلام بحيرى فى السجن، من تظاهر دون إذن فى السجن طيب وتوفيق عكاشة اللى شاتم مصر كلها ده، واللى كذب ملايين الأكاذيب السياسية داخل البرلمان، واللى مسخر المحطة للمشتمة، دا لو كان له فلوس عند حد يطلع يشتمه فى البرلمان، وانا فاكر كنا فى احتفالات 6 أكتوبر الماضية وكنا فى الكلية الحربية وقابل أحد الزملاء وقال له أنا ليا عندك فلوس إعلانات لو مجبتهاش هفضل اشتمك فى محطتى لحد ما تدينى الفلوس اللى عليك".
واستطرد خالد صلاح، قائلا: " هذه النماذج التى تصدرت المشهد فى المجتمع للأسف الشديد بالفوضى والحقيقة برخاوة الأداء القانونى مليون مرة يحصل أخطاء وعليه ديون كثيرة فى لمدينة الانتاج الإعلامى طيب فين الدولة؟، طيب زمان الدولة كانت تختار المعارضين وكانوا قيمة وقامات المهندس إبراهيم شكرى وكمال أحمد والحاجات العظيمة النبيلة حتى اليسار المصرى العظيم النبيل المصمم على موقفه نختلف معه ولكنه يطرح موقف سياسى وفكرى وخلاف وطنى مع السادات على كامب ديفيد ومع السادات وانتفاضة الخبز على الانتفاح وسياسته وقضايا تخص البلد، واختلفنا مع مبارك على الخصخصة وبيع البلد والتوريث، اختلفنا بفكر ورقى، أما حاليا اختلفنا على أيه، عايز تروح تشتم الصحفيين ومحدش يكلمك؟ عايز انت تشتم الناس ومتتشتمش؟ عايز تفتح كل الفضائيات شتيمة وانت متتشتمش؟، دا أية الهوس السياسى ده؟ الدولة لازم تفعل القانون نائب أو مش نائب هو أنت بتتفرعن بالحصانة؟".
خايف على برلمان بلدى من أمثال توفيق عكاشة
وواصل خالد صلاح هجومه على توفيق عكاشة قائلاً: "رأيى اللى زى توفيق عكاشة ده شوهوا السياسة فى مصر وأنا أسف بصراحة بس خايف على برلمان بلدى، زى عيل صغير لما يبقى فى زفه ويرمى طوبة فى الكلوب العيال الصغيرة بتهيص وراه، فأنت أمامك نوعين من التحفيز، تحفز الناس على أداء وطنى حقيقى وفاعل، أو تحفزهم على الفوضى والإسفاف والانحطاط اللفظى والعدوان الأخلاقى والكذب السياسى على الناس، وهذه النماذج حفزت الكذب السياسى والانحطاط فى طريقة الأداء السياسى، وهذه مأساة،، وبعدين مليون بلاغ سواء للنيابة أو الأجهزة ولا أى حاجة وبيفتحوها مشتمة إزاى ده إعلام قائم؟ وإزاى موجود ومنتشر .. ده افساد لعقول أطفالنا والسياسيين الصغيرين، ليه لأنه عندما تزرع فى عقول سياسين وشباب صغير أنه عندما تكون أكثر احترافاً للكذب السياسى وأكثر قدرة على اختيار ألفاظ مسيئة وغير مؤدبه يبقي تكسب أكتر؟".
عكاشة تجاوز الأدب مع الصحفيين ولابد من وقفة ضده
وأردف خالد صلاح:" يبقى لما تعمل كده انت بتخلى الناس تصل إلى مرحلة أن توفيق عكاشة نموذج، دى حاجات لازم لها مواقف، هو امبارح شتم الزملاء الصحفيين وتجاوز فى الألفاظ وتجاوز فى الأدب، والمفترض أنه نموذج يتم تصديره للناس، عيب، بس هل هذا البرلمان سيستمر على هذا النهج، دا فؤاد بدراوى دخل الجلسة وقالهم لو فضلنا كده البرلمان ده هيتحل، طبعاً لو من الحكومة يتلعب بيه، خسارة نصل إلى مرحلة من الإحباط على النحو المخيف من الأداء البرلمانى وأن يعبث صغار السياسيين وطفيليات الساحة الإعلامية تعبث بنا إلى هذة الدرجة وتوصلنا للدرجة دى، ولا نبرئ نفسنا من الأخطاء لكن من الانحطاط الإعلامى والسياسى".
موضوعات متعلقة :
- بالفيديو..خالد صلاح ب"آخر النهار": مجلس النواب"كئيب" وأُبارك للمهندس شريف إسماعيل..ويؤكد:برلمان مفكك ويصب فى صالح الحكومة.. والمصالح الشخصية تغلب عليه.. ويصدر الأزمات للرأى العام بدلا من حل المشاكل