حركة "بلاك فلانتين".. نصائح السناجل للعكننة على العشاق فى عيد الحب

ساعات ويدق عيد الحب أو "الفلانتين" الأبواب، وينشغل العشاق بالتفكير فى كيفية قضاء وقت ممتع سواء بالخروج والتنزه أو السينما، وتبادل الهدايا بينهما والتى يغلب عليها اللون الأحمر، الذى يميز هذا اليوم عن غيره من باقى الأيام.
على الجانب الآخر يظهر "السناجل" وغير المرتبطون، الذين قرروا ألا يمر هذا اليوم دون أن تكون لهم بصمة، وابتكار وسائل متعددة عملا بمبدأ "ينعيش عيشة فل.. ينموت إحنا الكل"، وهو ما جعلهم يعلنون الدعوة لمشاركتهم فى العكننة على أصدقائهم المرتبطين من خلال ال"فيس بوك" وفى "إيفنت" جديد عنوان "أزاى تنكد عليهم فى عيد الحب"، والذى أعلن ما يزيد عن 4 آلاف "سنجل" الاهتمام به، وانهالت عليه عشرات الطرق التى اقترحوها لوضع بصمتهم على هذا اليوم.
وجاءت من الاقتراحات ما كتبته سلمى سليمان: "نلبس أسود اليوم ده ونوزع قهوة سادة، ولو لاقينا اتنين حبيبة ماشين مسهوكين كده ننقض عليهم ونضربهم وكله بما يرضى الله".
أما سمر السيد، فكتبت: "هنزل اليوم ده وأروح لكل اتنين ماسكين هدايا، وأروح للى عمال يتسهوك وأقوله يا خاين يا ابن .....، بقى تاخد منى فلوس عشان ظروفك صعبة وتروح تشترى وتحب عليا واحدة مقشفة وتجبلها هدية بفلوسى يا بتاع مديحة كلينكس".
بينما اقترحت همس، قائلة: "بما أننا مش هنستفيد حاجة من الفلانتين، هنبدأ نشكل نفسنا فى فرق اسمها بلاك فلانتين، ونمشى فى الشوارع وأول ما نشوف اتنين حبيبه البنات السناجل تمسك البت من شعرها وياخدوا منها الهدية، والولاد السناجل يمسكوا الواد الحبيب ويفضلوا يضربوا فيه، عشان يحسوا على دمهم بقا ويراعوا شعورنا، ما هو يانعيش عيشه فل، يا نموت إحنا الكل".
كما قدم البعض مجموعة نقاط موجزة هى:
وأوضح الداعين للحدث عدة نقاط من أجل النكد على زملائهم المرتبطين فى هذا اليوم، ومنها:
1. لما صحبك يكون رايح يشترى هدية لحبيبته، طول ما أنت ماشى افضحوا والبنت طبعا تعمل نفس الكلام مش محتاجة.
2. لما يكون صحبك مزوغ من الدرس ومن المحاضرة ورايح يقابل البنت، اتصل بأبوه وقوله ابنك يا حج ساب الدرس وراح يقابل البنت فى الشارع اللى ورا الدرس".
3 . اعرف إزاى توقع ما بينهم وخليهم ما يتكلموش اليوم ده وارجع صالحهم تانى يوم.
4. اعمل تاج لصحبك فى بوست ونكد عليه بمشكلة حصلت معاها بسبب البنت.
5. لما تبقى صحبتك خارجة مع الولد اتصلى بمامتها وافتنى عليها، ولو مش بتحبى الفتنة خلى حد من الشلة يتصل يفتن، وأهو كله بثوابه.
6. وما تيجى تسألك إيه رأيك ف الطقم ده قوليلها وحش وعقديها فى الطقم.