18 نصيحة هامة لزوار معرض الكتاب للمرة الأولى.. خد كشكول صغير وحمل "جودريدز"

معرض الكتاب عالم خاص، وبالنسبة للزوار للمرة الأولى يعتبر هذا العالم غامضا، وربما لا يتمكنوا من الاستمتاع به والاستفادة منه بالقدر الكافى، ولذلك قدم رواد مواقع التواصل الاجتماعى من المواظبين على الذهاب للمعرض، مجموعة من النصائح الهامة التى يجب التعامل معها قبل التحرك نحو المعرض.
ونشر المدون أحمد صلاح الدين 18 نصيحة هامة لزوار معرض القاهرة للدولى للكتاب للمرة الأولى، لإزالة العقبات التى تواجههم وتوفيرا للوقت والمال.
وجاءت النصائح كالتالى:
1- لو أنت مروحتش معرض الكتاب قبل كدة فحاول من دلوقتى إنك تتعرف على تقسيمة المعرض وحجمه، وحاول تتعرف على دور النشر والمكتبات اللى هتشارك فى المعرض واللى أنت هتلاقى فيها اللى عايزه.
2- لو أنت من ساكنى القاهرة روح المعرض كل يوم، ولو مش هتقدر روح 3 مرات، مرة فى بداية المعرض ومرة فى منتصف المعرض ومرة فى آخر المعرض.
3- لو أنت ناوى تروح المعرض أكتر من مرة فمتصرفش كل فلوسك فى أول مرة، لأنك بعد كده هتروح تتحسر وتقول ياريتنى ما اتسرعت.
4- روح المعرض بدرى عشان بيكون زحمة، وكمان عشان تلحق تلف وتاخد وقتك فى شراء الكتب.
5- لو عامل حسابك على شراء الكتب فقط يبقى تاخد معاك سندويتشات ومياه، لأن الأكل هناك أغلى من بره، وهتضيع بردو وقت فى شراء الأكل.
6- قبل ما تروح المعرض اشترى نوتة أو كراسة صغيرة اكتب فيها الكتب اللى هتشتريها مع اسم المؤلف ودار النشر، وحاول تعرف سعرها كمان ورتبها حسب الأولوية.
7- متشتريش الكتاب من أول مكتبة تلاقى فيها الكتاب، لف الأول على باقى المكتبات ممكن تلاقى الكتاب بسعر أرخص وطبعة وجودة أفضل.
8- لو باقى معاك فلوس ومش عارف هتشترى إيه وهتلف بقى وتشترى اللى هيعجبك يبقى تبدأ بسور الأزبكية يا معلم.
9- فكك من اللى يقولك الكتاب ده جامد وحلو اشتريه، اشترى بس اللى أنت محددة ومحتاجه فعلًا.
10- قبل ما تروح استعين بسؤال المتخصصين والمثقفين والقُرَّاء عن الكتب.
11- لا تنخدع بألوان الأغلفة وجودة الورق ونحو ذلك، فإن جودة الكتاب ليست فى ذلك، وإنما اهتم بمعرفة الطبعات المعتمدة المحققة.
12- لما تيجى تشترى الكتاب هتعمل الآتى:
تقرأ المقدمة.
تقرأ الفهرس.
تبص على المصادر والمراجع.
تقرأ صفحتين من داخل الكتاب نفسه، ولو لقيت الكتاب يستحق اشتريه.
13- فاصل مع البياعين عشان بعضهم بيزود فى الأسعار جامد.
14- لو هتشترى كتب كتير ينصح يبقى معاك شنطة سفر من اللى ليها عجل.
15- لو فى كتاب عجبك متشريهوش كده على طول، اكتب اسمه وسعره ومكانه فى الكراسة الصغيرة اللى معاك ودور الأول فى باقى المكتبات، يمكن تلاقى سعر أفضل ولو ملقيتش ابقى ارجع اشتريه.
16- الهيئة العامة للكتاب بتطبع كتب كويسة وبسعر رخيص جدا 6 و7 جنيهات الكتاب، وبتطبع بردوا كتب ملهاش أى لازمة.
17- معرض الكتاب هتلاقى فيه كل الألوان شيعة وسنة نصارى بكل الطوائف فخلى بالك وحاول تبعد عن المشاكل، أنت رايح تشترى كتب مش تناقش حد ولا تتحاور معاه.
18- لو فى كتاب أنت متردد فى أمره ومش عارف تشتريه ولا لأ أدخل على النت من موبايلك وادخل على موقع Goodreads وياريت تكون محمله من playstore وشوف تعليقات القراء على الكتاب وتقييمه وشوف.