بعد رده على حكم إثبات النسب.. متابعو أحمد عز يهاجمونه فى صفحته على "فيس بوك".. البنات: مش مصدقينك يا عم الشيخ اطلع من الدور ده واعترف بولادك.. الشباب: لو صادق كنت عملت تحليل dna فين النخوة والرجولة

بعد قرار الدائرة 102 بمحكمة مستأنف الأسرة بالقاهرة الجديدة، برفض الاستئناف المقدم من الفنان أحمد عز على حكم محكمة الأسرة بإثبات نسب توأمى الفنانة زينة له، وتأييد الحكم الصادر من محكمة أول درجة بإثبات نسبهما إليه، انقلب جمهوره عليه، موجهين له الانتقادات على صفحته الرسمية على "فيس بوك".
اعترف بولادك عشان تحسن الشوية اللى فاضلين من منظرك
فى البداية قالت رانيا حسن:"اعترف بولادك عشان تحسن الشويه اللى فاضلين من منظرك حتى لو ما اتجوزتهاش بس دول ولادك.. لو مش ولادك اعمل تحليل dna وكدبها.. غير كده لا فى صباح الخير ولا جمعة مباركة"، وهو ما أكدته شيماء كامل مضيفة: "اللهم قوى ايمانك يا عم الشيخ.. بقولك إيه مش هتطلع من الدور ده بقى؟.. المخرج قال فركش خلاص ودول ولادك.. مفيش واحدة فى الدنيا هتفضح نفسها من غير ما تكون واثقة من اللى بتقوله.. ولو كنت صادق كنت عملت dna من الأول.. بس انت هتعمله دلوقت متعشم ترشى وتزور.. بس ربنا فوق الكل".
وكتبن ريهان أسامة ساخرة : "تصدق الدمعة هتفر من عينى.. لو هما مش ولادك روح اعمل تحليلdna وحط الورقة فى وش التخين.. بس لو انت عارف انهم ولادك وبتنكر مش هاقولك غير إن ربنا بيزيل النعمه من وش اللى بيرفضها"، فيما قالت سمر صلاح: "حسبى الله ونعم الوكيل فيك.. كل ده عشان زينة طيبة وملهاش ضهر فى الدنيا.. لكن ربنا ظهر الحق"، وأضافت رانيا أحمد: "انت طلعت إنسان (.....)" يا أخى اتقى الله بقا.. بكره تجوز وربنا يحرمك من الأطفال.. سقطت من نظرى من الآخر".
كنت تقدر تقطع الشك باليقين لو انت صادق وتعمل تحليل DNA
أحلام فهمى قالت :"كنت تقدر تقطع الشك باليقين لو انت صادق وتعمل تحليل DNA.. مش متعاطفة معاك ولا مصدقاك.. مش دفاعا عن زينة بس كلمة حق.. يا خسارة وللأسف كفاية ان 1327 من معجبينك مش مصدقينك ومكذبينك"، بينما قالت نهال فوزى :"فعلا أنا اتصدمت فيك وسقطت من نظرى.. ذنب الأطفال ايه.. حسبنا الله ونعم الوكيل".
عيب يا عز اللى انت عملته ده
أما آراء الشباب فكانت قاسية هى الأخرى، حيث قال حسين: "طيب لما انت مظلوم كده وواثق فى نفسك.. مرضتش ليه تعمل تحليل DNA كنت هتعاطف معاك لو كنت عملته.. لكن بعد رفضك ده بيأكد انك بتكدب وخايف.. وبكره تتمنى تشوفهم وهما اللى مش هيرضوا وهتندم لان الشهرة مش دايمالك.. وفعلا(ولا تحسبن الله غافلا عما يعمل الظالمون)".
وهو ما اتفق معه كريم، قائلا:"عيب يا عز اللى انت عملته ده.. أنا بحترمك ومش عارف انت رفضت تحليل اثبات النسب ليه.. ورجعت تحن لما عرفت إن النهاية وإن الحق مش فى صالحك"، بينما قال بيبو:"حسبى الله فيك انت وأمثالك من الرجال المزيفين المجردين من النخوة والشهامة.. وبكره يمر بيك العمر وتشتاق لحضنهم وتشحت منهم الحنية وتتمنى لو العمر يرجع..".
كان أحمد عز قد كتب على صفحته على فيس بوك بعد حكم المحكمة:"كتير سألوا عليا امبارح وانا باطمنكوا انا الحمد لله كويس وزي الفل وراضي باللي ربنا كاتبهولي كله، انا كمان مش بس راضي انا سعيد "بالابتلاء" اللي انا فيه عشان واثق في ربنا وفي نصره ان عاجلا او اجلا!!! وان اللي انا فيه ده ماهو الا رفع درجات بإذن الله. طبعا انا لا اعلق علي احكام القضاء ومش هاطلع اعمل دوشه ولا اتكلم عشان انا سايب حقي علي ربنا العادل الحق. اللي بقولهولكوا دلوقتي هو نفسه اللي بقوله من اول يوم في القضيه وهافضل أقوله لآخر نفس في عمري.. وبأشهد الله علي كلامي ده بل وأقسم بالله العلي العظيم "اني ماتجوزتهاش ولا رسمي ولا عرفي ولا شفهي ولا ثانيه وان شاالله يكون معاها 100 حكم و100 شهاده ميلاد برضه مش ولادي"، مختمما بالاستشهاد بقوله تعالى"ولا تحسبن الله غافلاً عما يعمل الظالمون إنما يؤخرهم ليومٍ تشخص فيه الأبصار".