مدد.. يا سيدى المونديال.. بركاتك والنبى على الرجالة والعيال

انفض مولد سيدى المونديال بعد الليلة الكبيرة بين الإسبان والهولنديين، ورجع كل شىء لطبيعته.. وعاد كل من حضر «المولد الكروى» إلى بلادهم مرة أخرى.
المولد الكروى طبعآً يختلف عن موالد الأولياء وأهل البركة فى ربوع ريف مصر وصعيدها.. وبطبيعة الحال كل من يعود من محاسيب الموالد إلى الأهل بيرجع شايل من روايح المولد وهداياه.. زى الحلوى.. والحمص وكمان عروسة المولد.. والولد اللى بيقولوا عليه الشاطر حسن راكب حصانه.
ثقافة الموالد بتقول إن الجميع بيحضروها مش علشان البركة والفرجة بس.. لكن كمان علشان يتابعوا ويتفرجوا.. ويشوفوا كل جديد.. من الحواة.. والفنانين.. وحتى المشعوذين.. والدجالين.. واللى بيلعبوا بالبيضة والحجر.. وعلى كتفها تنور.. على رجلها تنور!!
المفروض أن جديد مولد الكرة باعتباره أكبر الموالد لسيد مشايخ اللعبة المجنونة.. والطريقة «الفيفاوية» بيكون فيه أحدث الحاجات والمحتاجات.. وتتعلم منه «خد.. وهات».
فهل ينقل لنا مشايخ «سيدى الجبلاية» جديد مولد الموالد بتاع سيدى المونديال؟!
الحقيقة والطبيعى إنهم بينقلوا كل اللى شافوه قبل ما ينصبوا شوادر مولد الموسم الكروى المصرى، خاصة أن سيدى الجبلاية «خادمه» السيد زاهر تم استبداله بآخر هو المهندس هانى أبوريدة.. والراجل كان ليه استقالة قبل أمم أفريقيا 2010 بثلاثة شهور محتجاً من خلالها على طريقة إدارة «مولد الكرة المصرية».. وانفراد خادمها زاهر بكل البركات والنفحات.. وشوادر الحلاوة.. والسكر النبات!
المولد المصرى كان فيه بس حواة.. جمع «حاوى».. واللى بيلعبوا بالكرة والحجر.. والحكم!
لكن فاحت روائح «الدجل».. واستعملنا البخور والنذور.. والأحجبة للفوز الوقتى حتى لو اللعبة متذبذبة!
أكيد بعد مولد سيدى المونديال لازم يكون فيه جديد.. لأن إحنا بعيد خالص عن تنظيم الموالد الكروية.. أو حتى المشاركة فيها.. بسبب «البخور.. والنذور».. ورفضنا للعلم والحياد.. واللى يتكلم عنهم ممكن ينطرد من البلاد!
أما حكاية الاستمرار محلك سر.. فلازم نقول للسادة خدم «سيدى الجبلاية» بقيادة شيخ الطريقة الاتحادية الجديد هانى أبوريدة إن إحنا مش هانقبل نكون أقل من اللى شفناهم فى «سيدى المونديال».. ونكون أقل ليه؟!
ببساطة لازم ترتيب كل شىء.. يعنى مثلاً.. وضح أن الإدارة علم.. مش فهلوة وشطارة ومحاسيب للمجاذيب، وده اللى قالوا لنا إنهم بيعدوه ويوضبوه عن طريق إعادة الهيكلة سواء بوجود أكفاء فى المناصب التنفيذية.. أو الاستعانة بالتكنولوجيا والعياذ بالله!
أما إذا كان فيه محاسيب فممكن يتم إعدادهم وتدريبهم علشان يكونوا على مقاس الوظائف.. مش بس يقعدوا طوال الوقت فى حلقة ذكر.. والله حى المجلس جى!!
أما لجان اللعبة والاحتراف ودول طبعاً أهم «شوادر» أى مولد كروى.. فلازم تكون شديدة الحياد بالنسبة للناس والكيانات فلجنة الحكام تحتاج عدالة مش واحد يقول كله تمام.. ولجنة اللاعبين عايزة واحد له فى القوانين تدابير وخبرات كتير مش نجم دمه تقيل.. بيقيس بكل المكاييل إلا الحق دايماً كفته لا تميل!
كمان لجنة المسابقات عايزة حكمة ولائحة ماتعرفش ألوان ولا صدقات.. مش كل واحد عايز عقوبة يقولوا له هات، لأن المسابقات أهم شادر مش محتاج حركات ولا بركات!
عايزين كمان نشوف لجنة التظلمات.. فى شادر كبير متفرقش بين نادى صغير ولا اسمه من العيار الثقيل.
أما المسابقات نفسها وكراسة شروط الاحتراف فتحتاجان للاعتراف بأن المستوى فى الحضيض ولازم ينصلح الحال بعيد عن العم والخال والمدربين اللى لهم معارف ومعاهمش رخص ولا لهم ملفات.
الناشئين أو عيالنا الكرويين لازم نكون بيهم مهتمين، لأن منهم اللى هايخللى للمولد رواد كتير ويدخل دخل مالى كبير، بس يعرف أن مستقبله هو اللعبة ووظيفته اللعب مش الهمبكة.. وكفاية عليه المدرسة لحد ما يقرأ ويكتب، وياريت يتعلم لغة وكمبيوتر، علشان لما يسافر موالد برة.. تكون بلده متميزة مش يقولوا عليه كان فى «جرة.. وخرج برة»!
مدد يا سيدى الجبلاية.. ألف ومليون مدد.. عايزين مولد كروى معروف ولعبتنا تخللى اللى عايز يتفرج يشوف نجوم وإدارة.. مرة واحدة يا ناس عايزين يكون اللى بيدير اللعبة عنده ضمير ويراعى مشاعر الجماهير.. وكفاية عليه طبعاً إنه أصبح من المشاهير.. وبيكسب من شهرته فى عمله مال وفير..
بصراحة من غير التغيير مش هانسكت ولا نصبر.. وهانفضل وراه لما يطير.. مدد يا سيدى المونديال مدددددددددد.