وائل رياض على "فيس بوك": "انتظرونى مديراً فنياً للأهلى بإذن الله"

كشف وائل رياض "شيتوس" لاعب الأهلى السابق ومدرب الإنتاج الحربى الحالى، عن كواليس الاشتباك بين لاعبى الأهلى والإنتاج الحربى عقب إطلاق صافرة الحكم نهاية لقاء الفريقين، والتى انتهت بفوز القلعة الحمراء، بهدف قاتل لعماد متعب فى اللحظات الأخيرة من المباراة، مطالباً من الجميع أن ينتظروه مديراً فنياً للأهلى قريباً.
وقال شيتوس عبر حسابه الرسمى على موقع التواصل الاجتماعى "فيس بوك"، "الناس اللى فاهمة إنى كنت بتخانق مع لعيبة الأهلى دول ناس مش فاهمة حاجة، أنا نزلت عشان لقيت اللعيبة بتتخانق ونطيت على حسام غالى عشان لقيته بيشتبك مع فادى نجاح، وكذلك عماد متعب كان بيتخانق مع محمود عبد الحكيم وبردو نزلت عشان أفض الاشتباك ده والحمد لله قدرت أعمل كده".
وأضاف شيتوس: "بعد المباراة كنت متواجد فى غرفة ملابس الأهلى ببارك لهم على نتيجة المباراة، وأخدت محمود عبد الحكيم وفادى نجاح لغرفة ملابس الأهلى عشان يعتذروا لمتعب وغالى وفعلاً تم الصلح"، متابعًا "لعيبة الأهلى الكبار الموجودين مش زمايل ليا أو أصدقاء، دول أخوات بمعنى الكلمة، وعلى فكرة متعب وعبد الله السعيد روحوا معايا بعد الماتش".
وعن عصبيته التى ظهرت بعد اللقاء، قال شيتوس: "المشهد اللى ظهرت فيه وأنا على الخط متعصب ده بسبب إحساسى إن فريقى اتعرض لظلم باحتساب 6 دقائق وقت بدل ضائع، وده من وجهة نظرى، وبالرغم من اعتراضى إلا أننى لم ولن أتلفظ بأى كلام للحكم الذى أكن له كل احترام".
وأضاف شيتوس، النادى الأهلى علمنا الإخلاص والاجتهاد والابتعاد عن أى شبهة وضرورة النزاهة دائماً، والحمد لله الواحد دائماً بيحاول يعمل ده عشان هو ده اللى اتربيت عليه فى النادى، مبروك للأهلى اللى بتمنى من كل قلبى إنه يكون بطل الدورى، ومبروك للإنتاج الحربى الأداء الرجولى الجيد أمام فريق كبير، شوقى غريب مدرب بجد محترم".
واختتم رياض كلامه قائلا: "انتظرونى مديراً فنياً للأهلى بإذن الله".