سلامتها أم حسن... وسيبك منهم يا جمال

العنوان غريب صح؟؟؟ أنا عارف كده بس أعمل أيه ملقتش حاجة غيره تعبر وتقول وتوصف وتشرح وكل الأفعال المضارعة فى اللغة العربية، وبينى وبينكم أنا زهقت خلاص وبفكر فى حلول تريحنى بس مش عارف آخد فيها قرار.. طيب ساعدونى وقولولى على رأى عبد الحليم... أعمل أيه؟؟؟
أسافر من البلد دى واخلص وارجع تانى لما أشوفها عروسة العالم زى زمان ومفيش فيها ظلم ولا محسوبية وتتلغى فيها كلمه أنت مش عارفنى... أنا فلان ابن فلان.
اسكت خالص وامشى جنب الحيط وآكل وأشرب وأنسى وأنام ومليش دعوة بأى كلام ولا اتكلم فى المليان كل كلامى عن الكورة والفنان وأنسى أزمة المحاميين وحوض النيل والاعتصامات والإضرابات والانتخابات وأهتف فى الآخر بأعلى صوتى للكسبان... عاش الجنيه الغلبان عاش الجنيه الغلبان.
أحسن حاجة أشغل بالى بكأس العالم كورة نظيفة ومتعة وفن وعالم هايصه فلوس وجمال ومش ناعيين للدنيا هم ولا عندهم كانى ومانى ولا أعلام ورياضة بتحرق ليهم كل الدم.. شايفين العالم كله بيتمع وماسكين لبعض السكاكين علشان متعب راح وسافر ولا علشان جدو جه وسابهم والمعتصم الإسمعيلاوى بقى أهلاوى.
على فكره أنا بتاع كلام وأونطجى ومقدرشى أعمل حاجة من الكلام ده لأنى ببساطة معييش فلوس أسافر وأبعد ولا تخلينى أسكت وأشرب وآكل وأنام ولا أقدر أنسى همومى ولا حتى أشوف كأس العالم مرتاح.
سلامتك يا مصر... ألف سلامة عليك.. سلامتك يا أم الحسن بضم الحاء مش حسن زى ما قال عدوية زمان سلامتك يا أم الجمال... النيل والأهرامات والحضارة مش جمال عبد الناصر ولا جمال ابن الريس.
وبمناسبة ابن الريس، عاوز أقوله كلمة صريحة أنت كويس يا جمال بس يا ريت تبقى لوحدك علشان نختارك بقلوبنا قبل عقولنا وسيبك منهم وأنت عارفهم اسمع منى ده مش كلامى ده كلام شاب من ملايين الشباب المقهور المظلوم المحروم الموجوع المسلوب المهدور حقه فى بلده.
بقولك أيه يا مصر... وحشتينى وأنا عايش فيكى ونفسى أشوفك ست الكل نفسى... أشوفك زى زمان بس يا ريت ملقاش حد يقولى (عاوزنا نرجع زى زمان قول للزمان أرجع يا زمان).