جرب نار الغيرة!

إيه اللي يضايق جوزي ويخليه يشتكي لطوب الأرض أني خنقاه؟؟؟!!! إيه اللي عملته لما كل ما أنزل وسط البلد أعدي عليه في مكتبه!!! وإيه اللي ينرفزه لما أشوف من وراه مين اللي كلمه علي الموبيل والرسايل اللي بتجيله، أو أني أدور علي صاحب النمرة اللي من غير اسم، ايه اللي يضايقه، وإيه الخنقه في كده!!! وإيه العجيب لما كان في مؤتمر في إسكندرية وبالصدفة لقاني في اللوبي واتخانق معايا والمصيبة أنه مصدقنيش لما قلت له أني كنت زهقانه فأخدت العربية ونزلت سقتها وفوجئت بنفسي في إسكندرية!!! بتحصل يعني أنا مش حالة غريبة!! وإيه القضية لما أكلمه كل يوم والتاني وأقوله أني في المستشفي ويجي يلاقي مفيش حاجة؟ من حقي أخاف علي جوزي وخصوصا أنه أحلي مني زي ما الكل بيقول وبصراحة كمان عينه زايغه..!! وطالما اخترني أنا من وسط كل اللي عرفهم يبقي أكيد مش هايرتبط بحد... ده اللي كانت مايسه صاحبتي من النادي دايما تقوله لي، لكن اللي حرق دمي أني مقدرتش أعرف إيه المكالمة اللي كانت بتيجي له ويقعد يرغي بالساعات وبصراحة استخدمت كل الوسائل الممكنة لغاية ما عرفت صاحبة التليفون وبالأدب هددتها إنها لو مبعدتش عن جوزي أني هابلغ عنها شرطة الآداب!!! المهم إنها اختفت وبصراحة خفت أن تظهر واحدة تانية، وخصوصا أنه من النوع اللي مش بيعرف يكسف حد... واللي زود خوفي أني لازم أسافر الإسماعيلية لأن ماما تعبانة وحاولت اتهرب من السفرية لكن فشلت ومبقتش عارفة أعمل إيه ؟؟؟؟ إلا أن مايسه صاحبتي اقترحت علي أننا نشغله بأي حاجة لغاية لما أرجع ولقيتها بتقولي أنتي بتثقي في ولا لأه؟؟؟
إيه الكلام ده أنتي معرفة من شهور ومشفتش منك إلا كل خير.قالت لي: خلاص سافري واستريحي وانا هاتصل به يوميا وكده تضمني أنه لا هايخرج ولا يبص هنا ولا هنا وعلي الأقل تبقي عارفه هو مع مين...
بصراحة الفكرة عجبتني وخصوصا أن مايسه مش الستايل بتاعه ولا هي بتحب شكل جوزي خالص... وسافرت لماما وأنا مطمنة وخصوصا أني كل ما أتكلم علي التليفون الأرضي الاقيه في البيت ده غير أن مايسه كانت بتديني التقارير أول بأول ورجعت من الإسماعيلية بعد 3 أيام ولقيت جوزي خروجه قل وبصراحة مبقتش عارفة أشكر مايسه ازاي، وقالت لي مايسه أنتي جيتي خلاص بقي أوقف موضوع التليفونات.. واتحايلت عليها تكلمه شوية عشان ما يكشفش العملية ويعرف أني أنا اللي مرتباها ويعند وتبقي بدل الواحدة اتنين ؟؟؟!! ووافقت مايسه وبقيت أعرف ميعاد التليفون فأسيبه وأنا بقول لنفسي أهو كده أريح من الجري والتنطيط وراه في كل حته.. وبقيت مرعوبة لو عرف أن مايسه دي من طرفي وفي يوم لقيت مايسه بتقولي أظن أنا عملت اللي علي وزيادة... قلت لها الصراحة دي خدمة العمر، ده أتلم خالص والحمد لله أنه ميعرفش أنك صاحبتي... لقيتها بتقولي وهي سعيدة لا وهايتلم أكتر في ظرف يومين وهاينسي موضوع التليفون ده خالص!!!
معقولة يا مايسه!! أنتي قدرتي تعملي اللي فشلت أنا فيه إزاي عملتي إيه؟؟ لقيتها بتقولي وبكل بساطة أصلنا قررنا نتجوز...!!! بعد بكره ومتزعليش مني احنا لغاية كده معرفتنا انتهت!