إلى ضمير العالم

رسالة إلى كل العالم
غرب وشرق وبيض وسود
ليه الدم الطاهر يسيل؟
وقلوبنا قاسية وفيها بُرود
يا ما ناس محتاجة قوتها
وكل فلوسنا سلاح وبارود
وناس شبعانة بترمى البحر
وشعوب مش لاقية حتى الدود
وليه بندمر كل سلام؟
وصوت الحق طريقه مسدود
ليه بنزرع شوك وعداوة؟
وندبح طفل فى عمر ورود
حرب وقتل كمان تشريد
ودمار فى كل مكان موجود
فين العقل بتاع إنسان؟
ضاع وبتسخر منه قرود
وضمير العالم أخرس أعمى
منزوع الرحمة عليه قيود
معايير مزدوجة كإنها غابة
ضعيفها فيها بتاكله أسود
تسليح نووى وحرب إبادة
قنبلة فسفورى أوعنقود
هوا المخ دا فينا اتجنن!
ولا دا تار من عهد جدود
دا إحنا ابونا حوا وآدم
جرجس ديفيد أو محمود
ليه بنكره بعض نعادى؟
وسلاحنا على بعضينا ممدود
صورة مقلوبة فى كل الكون
غباء متناهى بكل حدود
ليه الشر بيملا قلوبنا؟
قلب بيقسى والتانى حسود
وليه الكل عايش متوتر؟
غدر ومكر كلام مشدود
تعالوا نبنى بجد سلام
نحفظ ود نصون عهود
نلقى حياتنا بقيت جنة
ونزرع حب بنينا يسود
ليه بنحطم أجيال جاية؟
تتيتم تلقى أبوها مفقود
ابنك يلقى الدنيا خراب
يكره إنه فيها مولود
عايزين شمس سلام تنور
والحب ينادى يلاقى ردود
تعالوا نمد إيدينا لبعض
ولا َّ دا حلم وعايز شهود
بصمة عار فى جبين العالم
لما دعاة الحرب تقود
يا صوت العالم يا حكماء
إمتى ضمير العالم يعود؟