مرتضى منصور ل"اليوم السابع": "فيريرا مغرور وغبى.. واللى أخد الكأس اللاعيبة الرجّالة والدورى بجهد الأجهزة الفنية السابقة.. هجيب 2 مصريين معاه.. لما بنفوز يُحْمَل على الأعناق ولما ننهزم أنا اللى بتشتم"

قال المستشار مرتضى منصور، رئيس مجلس إدارة نادى الزمالك، إن فريرا، المدير الفنى للأبيض، راجل "عِنَدى" و"مغرور" و"غبى"، وحُذِّرَ 100 مرة.
وأضاف منصور فى تصريحاتٍ ل"اليوم السابع" فور وصوله مطار القاهرة الدولى: "بطولة الدورى مش هو اللى جابها، دى نتاج جهد لعيبة أولا ومش هاقول مجلس إدارة، لكنه جهد لاعبين وأجهزة فنية سابقة، حسام حسن وإبراهيم حسن، وميدو، ومحمد صلاح، وفيريرا استلم الفريق وهو الأول، وفرق 8 بنط وجبناله أفضل لاعبين، والفريق اتغلب من إنبى، والمقاصة، ووادى دجلة، واتغلب من الأهلى 2 صفر، وضيع مننا الكونفدرالية للأسف الشديد بالغباء بتاعه لما اتغلب هناك 5 وكان الأفضل أنه يقفل الماتش".
وتابع مرتضى منصور: "ومش هو اللى كسب 3 فى ماتش العودة، اللاعبين اللى كانوا 10 هما اللى كسبوا، هو ما كانش بيعمل حاجة، وأنا عملت محاضرة قبل الماتش للولاد وقلت له اطلع بره، وقلت للاعبين ده شرفكم الرياضى دافعوا عن اسمكم واسم نادى الزمالك، وماتش الأهلى الأخير أنا قلت له هتخسر لأنه بدأ بتشكيل منهم محمد إبراهيم بقاله سنة مش بيلعب نسى الكرة تقريبا، وحمادة طلبة بيلعب يمين هو حاطه شمال".
وأشار رئيس نادى الزمالك إلى أن فيريرا يكره إبراهيم عبد الخالق "لأنه مش هو اللى جايبه، لكن اللجنة التى شكلتها هى اللى جايباه، وقال إن كل اللاعبين اللى جابتهم اللجنة مش هاتلعب، كما أن فيريرا قال إن حمودى اللى جاى من سويسرا مش هايلمس الكورة، ومحمد سالم مش هايلعب، إذا أنت هنا جاى تدمر الفريق وغير كدة المدرب مش عايز أيمن حفنى ومش عايز دويدار، كما أننى أحضرت للفريق أحسن مهاجم فى مصر خالد قمر، راح بيلعبه خط وسط لما خلص على اللاعب، كذلك أحمد سمير، أحسن باك شمال خلص عليه فى كل هذه الأحداث، نحن ننصح مرة واتنين وتلاتة داخل الغرف المغلقة، آخرها يوم الماتش سألته عن دويدار وطارق حامد، وأخبرته أننى آسف لأن بهذا التشكيل سوف نتغلب فقال لى أنا أتحمل المسئولية وقلت له كلامى واضح لو اتهزمنا، وقلت يا إسماعيل يا يوسف بلغ رسالة واضحة فى وجود المترجمين، ورد فريرا قال أنا المدير وأنا اللى أتحكم وأنا اللى اتكلم، فقلت له وأنت اللى تشيل الشيلة، وعموما لدينا اليوم اجتماع مجلس إدارة الساعة 9، وعايز يقعد هاجيبله 2 مصريين يكونوا معاه، ويا فيريرا اللى أخد الكأس مش أنت، اللى أخد الكأس اللعيبة الرجالة وجنش اللى صد ضربات الجزاء".
ووجه المستشار مرتضى منصور حديثه للمدرب: "أنت مدرب فاشل ومغرور ومايهمنيش الجمهور اللى عايز يقعده يروح يقعده فى بيته، هو مش عايز يتعلم وأنا مش عزبة وأى حد من الجمهور مش عاجبه يشرب من النيل، وأنا اللى بدير وأنا أتحمل المسئولية لما بنتغلب بتشتم، ولما نفوز فيريرا يُحْمَل على الأعناق، والمرشحين لتولى المهمة هم طارق مصطفى، ومحمد صلاح، ومدحت عبد الهادى بدلا من علاء.. وأيوة بتدخل وهتدخل".
أخبار متعلقة..
- مرتضى منصور يواصل هجومه على فيريرا: يافاشل يامغرور أنا اللى بتشتم فى الآخر
- مرتضى منصور: "رئيس الوزراء شكرنى على مباراة السوبر وقالى أنت شرفت مصر"