محمد فتحي يكتب: لقطتين أطاحوا بحلم مصر من المونديال !!

الكورة في الآخر لعبة .. مكسب وخسارة
وانا واحد من الناس اللي كانوا ، ولا يزالوا، متشعبطين بأي فرحة حتى لو هتيجي من الكورة
ويمكن هو ده اللي خلى الواحد يقبل دعوة فودافون للسفر لكوماسي إضافة للتجربة اللي عمري ما احلم اني كنت اعملها بإرادتي الحرة (واحد سافر غانا يقضي العيد ويتفرج على ماتش من الاستاد لأول مرة ف حياته .. فيه حد ممكن يعمل كده غير لو معزوم
عموماً مش هتكلم في الفنيات
أنا راجل مش بتاع فنيات
سيبك من ان المنتخب ماسافرش منه غير تريكة وفتحي
وسيبك من شريف إكرامي اللي حسينا انه مهزوز وانه هيطلب يبدل لأي سبب
وسيبك من ان الاجوان اللي دخلت فينا واحد من وائل جمعة وواحد من نجيب وواحد من ضربة جزاء وواحد عشان أخطاء دفاعية ساذجة وواحد عشان مفيش تغطية
وسيبك من إني اشوف وليد سليمان بيلعب باك شكال
وان احمد المحمدي اللي بيلعب بالشوكة والسكينة عشان البرستيج ينزل على حساب واد كان ممكن يقطع الملعب زي حازم إمام
وسيبك من الإفيهات اللي طلعت بعد الماتش، والمطرة اللي شربناها قبل الماتش والعيا اللي كلنا عييناه تقريباً غير مشقة السفر رغم جمال الصحبة
وسيبك من حسام غالي اللي ماكانش فايق
وسيبك من ان منتخب كورة تبقى كل حلوله الهجومة ف إن تريكة يسقط الكورة لصلاح ويجريه عشان ينفرد
سيبك من كل ده .. أنا مابفهمش في الفنيات
أنا هتكلم في لقطتين ضايقوني وانا في المدرج اللي فيه الجماهير المصرية
اللقطة الأولى لما كان الكل كان بيهتف مصر مصر مصر..
وفجأة .. حوالي اربعة خمسة راحو مطلعين كابات صفرا عليها علامة رابعة
راحلهم حد كلمهم بالأدب وقال لهم بلاش لو سمحتوا يا جماعة فقالوله انت مالك
راحلهم حد تاني قال لهم بالأدب برضه احنا جايين نشجع مصر النهاردة بلاش الحاجات دي فقالوله هو انت من الشرطة .. مالكش دعوة
فحصلت قلة الأدب وكان الأمر يتطور لاشتباكات
لغاية ما تدخل البوليس الغاني وخد منهم الكابات
بس جنبينا كان مدرج غاني..
راحوله اصحابنا، وادوا للغانيين قدامنا بانر كبير عليه علامة رابعة وكابات صفرا من اياها ، وفهموهم ان ده يعني بيضايقنا وكده
ده غير انهم بعد كده قعدوا معاهم
يعني قاطع كل المسافة دي عشان يضايقنا ويعمل مشكلة وبعدين راح قعد مع الغانيين وادالهم بانر كبير عشان - قال يعني - يغيظ الناس
عموماً البوليس الغاني اتدخل برضه واترفع البانر ده
ولما جه واحد يهتف - قال يعني بيغيظهم - سيسي سيسي .. قلناله لا سيسي ولا سيسك.. الهتاف مصر بس .. والحكاية مش ناقصة
اللقطة التانية بعد الجون السادس ..
واحدة ست مصرية لابسة خمار وقاعدة في المدرج عندنا فجأة ودون سابق إنذار راحت قايلالنا
أحسن .. حسبنا الله ونعم الوكيل فيكم .. حسبنا الله ونعم الوكيل فيكم.. أنا جاية مخصوص عشان اشمت فيكم..
الموضوع كان هيتطور وحصلت شتيمة وكانت هتحصل اشتباكات لولا لمينا الدنيا
دي أول مرة احضر ماتش من الاستاد في حياتي..
ما ضايقتنيش الهزيمة مع طيبة الشعب الغاني ولعبنا الزفت ولاعبيتنا اللي ماسافرتش على قد ما ضايقتني اللقطتين دول
طبعاً مع احترامي للكل ..
دول لقطتين ضايقوني
فأستأذنكم عشان انا عارف الناس اللطيفة بتوع نوعية الردود بتاعة : دول أحرار، وده من حقهم، وقال يعني هما دول اللي جابولنا الهزيمة
كل دول مع احترامي لو لقيتهم في التعليقات أياً كانت درجة قرابتهم أو صداقتهم بلوك فوراً
وفيه نوعية كمان لطيفة لما بكتب سطرين زي اللي فاتو يروجوا كأي عيل صغير كاتبين : انت مغرور .. انت ما بتتقبلش النقد .. انت عايز رأيك لوحدك، والاسطوانة المشروخة دي .
دول برضه أستأذنهم ما اشوفهمش في التعليقات
لو يسمحوا يعني
على الهامش : تحية للجمهور الزملكاوي أعظم جمهور من وجهة نظري كأهلاوي ..
صبر سنين على هزيمة تاريخية ولسة بيشجع فرقته رغم انها لسة بتتغلب
ورغم انهم لعيبة ما يستحقوش
بس ده اللي احنا نفسنا فيه في ماتش العودة
حتى لو المنتخب خسر، وغالباً هيخسر
آه بالمناسبة : أنا المغفل الوحيد اللي كان بيطلب من الناس انها تبطل الافورة ف موضوع ان الإخوان بيشجعوا غانا، وبيقولولهم بلاش فجر في الخصومة وكده
ملحوظة : مش الغرض والله من البوست ده اننا نشتم الإخوان
انا بس متأذي من فكرة اننا وصلنا لكده