(مشاهد من فيلم سيريالى)

فى الأرض حلم
لكنه خايف فى يوم يعيش
وشه برىء .. لكنه محبوس ف الأفيش
(المشهد الأول)
خرجت الصبح
أدور على حلمى اللى سبته
جنب النيل
ملقتش حلمى .. ولا لقيت النيل الحزين
ملقتش غير خوفى اللى قاعد ف الخلا
تايه وباصص للسما
وعينه حبسه .. دمعتين
(المشهد الثانى)
الكل ماشى ف الشوارع من غير عيون
الكل فاقد الذاكرة
الكل خايف ف يوم يدوس
على ذكرى كانت مؤلمة
أجساد كتير ماشية فى أرض الشقا
والهنا .. مشنوق على دايرة قمرنا
المعتمه
(المشهد الثالث)
مرسوم أنا على ضل حيطه
والحيطه ضلى
(المشهد الرابع)
ماشى بيحلم بالأمان
وابنه جنبه
ورصاصه طايشة
قتلت لحن الحنان .. وقتلت أبنه
بكى الحزين .. واترسم فى عينه صوره للجنون
وبعد شهر .. كان الحزين
غرقان فى دمه
(المشهد الخامس)
سرقوا الجورنيكا
سرقوا حكمة بيكاسوا
من الأمم المتحدة
سرقوها وسرقوا العبرة
والحرب العالمية التالتة
كانت البديل
نسيوا البشر .. واتنست كل الحروب
والجنون .. عاد من بعد الرحيل
ماتسئلوش مين أقتل فينا البراءة
متسئلوش مين روى الأرض خوف
وازاى بقينا جوه غابة
متسئلوش عن أى شىء
استخبوا جوه الملاجىء
وانسوا الخرايط والحدود
ارسموا جورنيكا تانية
ارسموا بدم الجدود
أحلام تعيش طول الزمان
أحلام لا يمكن .. فى يوم تموت
(المشهد السادس)
فى القاعة فيلم حزين
بيروى حكاية أرض البشر
لكن الحضور فقعوا العيون
قطعوا الودان والألسنة
طاروا من غير أجنحه
وارتموا ... ف حضن القدر