لبن العصفور.. !!

جلس ينظر أمامه إلى المكتبة التى تمتلأ بالكئوس والميدليات وإلى شهادات التقدير التى تزين الحائط كأنها نجوم تتلألأ فى السماء.
طرق الباب بلطف ودخل الساعى يحمل القهوة وخلفه السكرتيرة.. البوسطة يافندم.. بفكر سيادتك الاجتماع بعد ربع ساعة مع الباحثين بالمركز.. هز رأسه ولم يجب بكلمة.. جلس متململا حتى جاء الموعد.. انتقل لقاعة الاجتماعات الواسعة قام الجميع تقديرا له.. تصدر المجلس وجلس.
بسم الله الرحمن الرحيم.. نبدأ الاجتماع الحادى عشر بعد المائه.. أستاذ نجيب.. أقرأ البند الأول.. البحوث التى لم تنتهى بعد.. وأسباب التأخير.. أنا ملاحظ يا أساتذة أن هناك بحوثا كثيرة متأخرة.. الناس اللى فوق كلوا وشى.. أن المركز لم يطلع بجديد منذ فترة طويلة.. إيه الحكاية؟؟
نبتدى بالأستاذة دولت.. أزاحت النظارة للخلف بطرف أصبعها وهى تقول.. شوف يافندم البحث بتاعى شارف على الانتهاء.. بذلت فيه مجهود جبار.. أثبت فيه أن أدهم الشرقاوى ماكانش شرقاوى ولاحاجة وكان غرباوى.. عظيم جدا يا أستاذة على الاكتشاف الهايل ده.. لكى مكافأة كبيره لما البحث يكون على مكتبى.. ربنا يبارك لنا فيك يا فندم.
الأستاذ برعى.. أنا مش عارف أعمل معاك أيه.. أنت من أقدم الأبحاث المتأخرة ومطلعتش بأى نتيجة.. يعنى معقول بقالك تسع سنين مش قادر تستخلص لبن العصفور.. يا فندم.. أعمل إيه إذا كانت العصافير ضعيفهة ومابتستحملش.. كل ماعصفور أقرب أطلع منه اللبن.. بيفيص فى إيدى.. لا يا أستاذ دى مش حجة.. خف إيدك شوية، وأنت شغال وحاول تخلص الموضوع ده.. المسئولون ينتظرون نتيجة البحث بفارغ الصبر.
الأستاذ جودة.. يا فندم أنا بعمل كل جهدى ومتنساش إن البحث بتاعى صعب.. يعنى يا أستاذ اكتشاف السبب فى الحب.. أن كان القلب ولا العين.. كان محتاج السنين دى كلها.. !!، ما عندك الأبحاث اللى قدمناها وشرفتنا فى الوزاره.. زى بحث الأستاذ مليجى اللى أثبت فيه خطأ سياسة أننا ندى ظهرنا للترعة وطلع بنتيجة أننا لو ندى وشنا للترعة ممكن يكون أفضل بكتير.. وبحث اللأستاذ مدكور اللى أتوصل فيه عن اللى قتل ياسين.. الأبحاث دى على الرغم من عظمتها ماخدتش وقت طويل كده.. ياراجل شد حيلك معانا شوية.
الأستاذ مخلص.. أبشرك يا فندم.. البحث خلص أمبارح.. وصلنا للطريقه اللى تخلى الناس بعد ماتشرب شوب عصير القصب تقدر تمسك نفسها وما تضطرش تفك نفسها تحت الكبارى.. السر فى الزعزوعة.. طلعنا بنتيجة.. أنه لو كل واحد مص عقله من الزعزوعة.. ممكن يمسك نفسه لغاية مايروح البيت.
صاح أحد الجالسين فى نهاية القاعه.. الله أكبر.. وتعالت أصوات التهنئة.. فعلا يا أستاذ مخلص بنهنيك من قلبنا لأن نتائج البحث ده هتغير وجه مصر الحضارى.. الريحه تحت الكبارى مطفشه السياح.
ننتقل للنقطة الثانية فى الاجتماع.. الأبحاث المتقدم بها بعض الباحثين للخطه الخمسية القادمة.. العناوين.. تطوير كوكتيل فخفاخينا.. الموافق يرفع إيده.. موافقة.. هل رأى الحب سكارى.. موافقة.. الجرجير وزراعته تحت السرير.. موافقة.. ليه البنفسج بيبهج وهو زهر حزين.. موافقة.. الرفاق حائرون حبيبها من يكون.
لأ يافندم الموضوع ده قديم ومش هنوصل فيه لنتيجة لأن آخر واحد من الرفاق مات وكان العزا بتاعه أمبارح.. جزاك الله خير يا أستاذ منصور إنك نبهتنا قبل ما نعتمده ونصرف عليه.. الميزانية أمانه يا خوانا ومش عايزين إهدار للمال العام.
ننتقل للنقطه الثالثه.. وهنا قامت السكرتيره بتوزيه لفه أمام كل عضو والأستاذ نجيب يقول ده الأختبار العملى وأستطلاع أراءكم على نتيجه بحث أخونا المندوه عن عجينة الطعميه بالخلطه السريه.. وهنا قام كل عضو بفتح اللفه التى امامه بكل همه.. فوجد بها أقراص من الطعميه الساخنه وبصل أخضر وطرشى لفت وجزر وعشرة أرغفة من الرغيف ماركة رمش العين الذى كان من منجزات المركز منذ سنوات وحصل على الميدالية الذهبيه والمركز الاول عن أنتاج الرغيف وزن الذبابة..
جلسوا يغمسون والسكرتيره توزع عليهم أكواب الشاى الكشرى وتصب الماء لمن يريد.. تعالت الأصوات من هنا وهناك.. هو ده الشغل ولا بلاش.. تسلم أيدين اللى عجنها.. أتجهت أنظار الأستاذ مندوه لمدير المركز.. وجد علامات الأستمتاع والرضا على وجهه..
سجلى يا أنسة مديحه.. مكافأه مرتب شهر للأستاذ مندوه.. تشجيعا له وتحفيزا لزملائه.. وهنا لم تتمالك زميلتهم أم الخير نفسها فرفعت يدها وأطلقت زغرودة مجلجلة ملأت القاعه.. لأ ياجماعه مش كده.. الفرحه متنسناش نفسنا..
وهو يمسح يديه وفمه قال.. النقطة الأخيرة.. صرف الحوافز.. وهنا أنتبه الجميع وظهرت علي وجوههم علامات الجد واليقظة المتناهية.. انتوا عارفين.. الميزانية محدوده وبعد مصاريف الأبحاث مابيفضلشى حاجه..
عموما أطمئنوا.. وعدونا بصرف مكافأة كبيره فى حالة تقديم إنجازات وأنا بعد أكتشاف موضوع زعزوعة القصب وعجينة الطعميه أكيد المكافأه مصروفه مصروفه.. تعالت الأصوات.. البركة فى سعادتك.. ربنا يخليك لنا.
وهنا وقف الأستاذ نيازى.. يا فندم أتوبيسات المعهد كل يوم عطلانه وبنتبهدل فى المواصلات.. و الكادر الخاص من عشرين سنه ماخدشى موافقه.. عايزين نعرف نعيش ونصرف على الولاد.. الصبر يا أخوان.. أنا متفائل بأن بكره هيكون أفضل لنا ولولادنا..
ودلوقتى ننهى الإجتماع.. وقف الجميع وبدأوا ينشدون.. .يارب بلدى وحبيبى والمجتمع والناس.. أجعلنى شمعه تنور بالحب والإخلاص.. أجعلنى دفعه قويه فى عجلة الإنتاج.. أخواتى تلبس وتاكل.. أخواتى تلبس وتاكل.. ولغيرنا ماااا نحتاااج..
رجع لمكتبه سعيدا.. جلس مسترخيا وهو يشعر براحة كبيره.. أمسك الجريده.. قرأ خبرا يقول الهند تطور أبحاث للنانوتكنولجى وخبرا أخرا يقول الفيمتو ثانيه أكتشاف العصر.. طوى الجريده وهو يحدث نفسه.. أيه الفسفسه دى.. نانو أيه وفيمتو أيه ووش ايه.. العالم دى رايقه وفاضيه صحيح.. !!
تليفون ياسعادة الباشا.. .أيوه سيادتك أنا لسه مخلص الأجتماع وفيه أخبار عظيمه جدا هتدعم موقف سعادتك فى المجلس.. أيوه يافندم.. أنجازات غير مسبوقه وأكتشافات هايله.. الله يخليك يا فندم كله من تشجيعك..
شعر برأسه ثقيلة.. .أغمض عينيه وماهى إلا لحظات.. خاااااا.. خووووو.. خاااااا.. خووووو.. سمعت السكرتيره الصوت.. نظرت بطرف عينيها من وراء الباب.. أغلقته برفق وهى تقول بصوت هامس.. قشطة ياباشا.. !!!؟؟