فى بعدى عنك اعذرى قسوة قلبى وأنا فى حضنك اعذرى إدياى لما ترفض تلمس أرضك حبيبتى ما بقتش بحس دفا شمسك قمرى إلى سهرت معاه ليكى مابقاش قمرك حبيبتى كل ما أحاول منك أقرب يطردنى أهلك أهلك إللى مش أهلى ولا أهلك إللى حوطوكى وسرقوكى وبعدوكى عن أهلك حبيبتى وحشتينى وحشتينى وأنا عايش فى صميم قلبك حبيبتى وحشتينى وأنا جمبك من كتر لمتهم حوليكى حجبوا عنى ضيك حبيبتى وحشنى مرحك وحشنى ضحكك وحشتنى حتى شوارعك حبيبتى أوعى يبعدوكى عنى ذى ما بعدونى عنك حبيبتى اعذرينى اعذرى ضعفى ويأسى واعذرينى ما بقتش أحسك بعت لك حبيبتى ألف جواب وما وصلنيش يوم ردك سامعه حبيبتى ندايا ولا خلاص مابقاش صوتى يوصلك حاسه بألمى ولا قدروا يقسوا قلبك لسه بتستنى فرحى ولا مابقناش نهمك حبيبتى لسه فاكرانا ولا مابقلناش مكان فى حضنك إحنا الأجداد إلى ضحوا بعمرهم لعمرك إحنا أولادك نبت ارضك إحنا أحفادك أمل بكره وفرحة عمرك عرفتينا ولا لسه ؟ إنت أصلا ناسية نفسك مش هقولك إصحى فوقى إفتكرى أصلك لأنك لو بصيتى مش هتعرفى نفسك يبقى النسيان أحسنلك حبيبتى اعذرينى باعوا أرضك هتكوا عرضك حتى أسمك بيتاجروا بيه يبقى إيه إلى فاضلك ؟ لبسوكى توب مش توبك ولا عمره كان يلقلك سرقوا أخلاق أولادك ونسوهم فرضك نسوهم كلمة وطن يعنى إيه واجب علموهم ادفع تبقى أنهب تعيش عيشوهم عيشة عمرها ما كانت لأهلك حبيبتى اعذرينى هرجع وأقولك إصحى فوقى العنيهم أطرديهم من جنتك إنت مش حاسة دى ما بقتش جنة بقت جحيم دمروا حلمى وحلمك حبيبتى اعذرينى لو كان كلامى ألمك أعذرينى لو أحييت جرحك أصل جرحك هو جرحى حبيبتى أنا حتة منك حبيبتى إنتى حبى إنتى عمرى إنتى أمى إنتى أصلى إنتى أرضى إنتى عرضى إنتى كل شيء فاضلى لكن أنا مجرد فرد من مجاذيب حبك حبيبتى فى دمى حبك فى ريحتى عطرك وأصلى أرضك منحتينى اسمك فى ملامحى رسمك حبيبتى عارفة بتحبينى أكتر ما بحبك حبيبتى سامحينى مقصرة فى حقك
