ما بين مستحيل وأكسر للبنت ضلع.. ردود أفعال الآباء على "لبس المايوه"

"مستحيل تلبسه..اقتلها لو لبسته..اكسر للبنت ضلع..ديننا وعادتنا بترفض ده"..هذه أبرز ردود رجال مصر على فكرة ارتداء بناتهن وأخواتهن وزوجاتهن للمايوه..وهنا يرصد اليوم السابع أهم إجابات آباء مصر ورجالها على سؤال ترضى بنتك تلبس مايوه ولو لبسته من وراك تعمل ايه؟
أحمد سامى، 28 سنة، يقول "الشباب محرومة من المناظر دى يعنى أول ما هيشوفها متاحة كده قدامه هتكون عرضة للاغتصاب والتحرش أكتر من غيرها، علشان كده مستحيل هلبسوا لبنتى".
كريم سلامة، يرد قائلًا: "ما اتربناش على كده علشان ننتظر من بناتنا يعملوا كده..هى البنت أخرها مع المايوه 8 أو 9 سنين بالكتير وكفاية عليها كده".
يعلق محمد رضا قائلًا: "بنتى عندها 9 سنين..لما بتلبس شورت قصير بمنعها، والمايوه مرفوض طبعًا ولو لبسته من ورايا حيبقى رد فعلى عنيف جدًا وأكيد هفهمها أن ده حرام وعيب فى ديننا وأخلاقنا".
قال محمد صادق: "مستحيل بنتى تلبس مايوه..بسبب أننا بنشوف التحضر فى الملابس والمكياج والمايوه ونسينا الفكر والعقل والعلم.. ياريت ناخذ من الثقافة الأوروبية ما ينفعنا ونترك ما يضرنا وبناتنا هم مستقبلنا فهم أمهات المستقبل.. فهل يعقل أن يكون أمهاتنا تفكيرهن فقط فى المايوه؟"
ويضيف قائلًا "لو بنتى لبست المايوه من ورايا..يبقى أنا معرفتش أربى..علشان التربية مش اعمل ومتعملش لا التربية تفاهم ومشاركة".
ويقول جان صبحى: "هرفض طبعًا أن بنتى تلبس مايوه، لأننا عايشين فى مصر وعادتنا وتقاليدنا متسمحش بده وهيتقال ألف كلمة عليها لو عملت كده".
ويضيف "أكيد لو ربيتها صح وعلى عادات وتقاليد مصرية مش هتعمل من ورايا حاجة بس لو حصل وعملت أكيد مش هقتلها علشان بنتى من واجبى عليها أعرفها الصح من الغلط بالحب مش بالخوف".
ويشير إلى أن كثير من الآباء يرفضون ارتداء بناتهم للمايوه، لأنهم يرون نظرات الشباب المراهق لهن بسبب الكبت الذى ولده الانفصال فى المدارس المصرية ما بين الذكور والإناث.
محمد سلام "35 سنة" يقول: "هناك أماكن كثيرة فى مصر لن تقبل أو تعطى الحرية للفتيات لارتداء المايوه..لذا من الممكن أن أجعل ابنتى ترتديه بشرط أن يكون شاطئ فى مكان "هاى كلاس" وغالى، علشان لما بنتى تلبس مايوه يبقى الكل زيها مش باصين ليها بعين المحرومين".
شريف مصطفى يقول: "لما نكون برا مصر هتلبسوا عادى لكن فى مصر مستحيل أنا كده يبقى بضحى ببنتى".
أحمد أبو منة، يقول، "احنا شعب متدين بالفطرة وديننا بيحرم البنت تلبس مايوه..أكيد مش هجبرها على ده غير لما تكون مقتنعة عشان متعملش كده من ورايا..وهبنى ثقة بينى وبينها عشان متعملش أى حاجة غلط من ورايا.. ولو عملت كده مش هضربها بس هعرف السبب اللى خلاها تعمل كده وأصلحه".
أحمد فتحى، قال، "لو بنتى عملت كده من ورايا هضربها ولو وصلت للقتل..إحنا صعايدة ومنسمحش بكده أبدًا..وعلى رأى المثل اكسر للبنت ضلع يطلعلها 44".
وصف الموضوع..
وهنا يرصد اليوم السابع أهم إجابات آباء مصر ورجالها على سؤال ترضى بنتك تلبس مايوه ولو لبسته من وراك تعمل ايه؟
جان صبحى
محمد صادق
أحمد أبو منة