فضيحة مجتمع

هل أصبحت النساء من المحرمات ف المجتمعات العربية ؟!!
أحيا أشعر بالذنب لانى اتخلقت بنت .. لان ف مجتمعى العظيم كل البنات عاهرات ( لامؤاخذة شمال )
الى ان يثبت العكس ( محدش يسألنى هيثبت ازاى لانى شخصيا معرفش ) ..
الرجالة ف بلدى الفاضلة بيحسسوا البنت ان جسمها مش ملكها .. لا .. دى ملك كل الايادى (القذرة)
الى بتقابلها البنت ف الشارع و المدرسة و والمواصلات وغيرة .. لا والجديد بقى ان لو البنت فكرت تعترض وتدافع عن نفسها الناس تقف كده وتقولها ( يابنتى خافى ع نفسك من الفضيحه ) ؟!!
زمان كنت فاكرة ان الفضيحه دى بتبقى للجانى مش المجنى عليه .. انما تقريبا دلوقتى كل حاجه اتشقلب حالها لدرجة ان البنت الى اتعرضت للتحرش أو الاعتداء من اى حد ماشى ف الشارع بقت هى الى لازم تخاف من الفضيحه .. منطق بردو .. بس مقرف حبتين .
الفترة الاخيرة جمعيات اهليه ومنظمات عالمية عملت احصائيات عن نسبة البنات الى اتعرضت للتحرش ف مصر .. وكانت النتيجة هى ان حوالى 64% من بنات مصر اتعرضوا بالفعل لعمليات اعتداء وتحرش !!
لا والشئ الى يدعوا للفخر الحقيقة ان مصر احتلت المركز الثانى على مستوى العالم بعد افغانستان من حيث نسبة تعرض النساء فيها للتحرش !!
عمار يا مسر ( مصر ) ..
بس الحاجة فعلا الى لفتت انتباهى ان كل الولاد الى بيعملوا كده عندهم ( شيزوفرينيا ) .. ايوة هقولك ازاى .. دلوقتى الولد الى بيتحرش ببنت ف الشارع ده عنده اخته ف البيت لما يكون ماشى معاها واى ولد تانى اتعرض ليها يزعل ويضايق جدا ويلوم ع الولد الى عمل كده انما ميلومش أخته ؟!! انما لما هو يعمل كده فى بنات الناس .. يقولك ماهيه الى لابسه ضيق ؟!
.. بذمتكم مش دى قمة الشيزوفرينيا ؟!!
والجديد بجد بقى ان الحكاية دى بقت دليل ع ( الرجولة ) يعنى الولد الى بيتكسف يعاس بنت او يضايقها يبقى ( عيل مش راجل ) .. انما الراجل الى بجد بقى هو الى يعاكس ف دى ويلمس ف دى ويضايق ف دى من غير ما يفكر ف مره ايه الى ممكن يحصل للبنت دى .. ف بنات بيتطور الامر ويوصل عندهم لحالات اكتئاب ورعب وخوف من الناس ومحاولات انتحار بسببك انت يا محترم .. ايوة بسببك .. بسبب انك عايش حياتك ميهمكش غير نفسك وبس ..
انت اتحرشت .. ها اتبسطت ؟ .. ها رضيت الشهوة الحيوانية الى عندك ؟
طب وبعدين ؟ يعنى ايه الى كسبتة ؟
بطل تقولى ان السبب لبس البنات الضيق .. والا كانت البنات لما تشوف ولد لابس بنطلون ضيق ولا تيشيرت ضيق تمشى وراه وتتحرش بيه وتضايقه ..
تخيل كده بنت بتتحرش وتعاكس ولد علشان لابس ضيق .. رد فعلك هيكون ايه ؟ تخيلت ؟ .. مها تخيلت مش هتعرف تحس بالى البنت بتحسه ..
ومحدش يقولى ان عدم التربية هى السبب .. بس تصدقوا السبب فعلا ف التفرقة بين البنت والولد .. علشان هو ولد مسموح ليه يغلط ويخرج ويشوف الدنيا .. انما انا علشان بنت يبقى مليش حق ف حاجه غير انى اسكت وانفذ وبس .. كفاية خضوووع يا بنات وخدوا موقف .
( الشارع ليا مش للتحرش بيا )
سألت بنات كتير عن رد فعلهم لما بيتعرضوا لحاجه زى دى .. طبعا اختلفت الاجابات ف الى قال :
- أنا لما بتعرض لموقف زى ده بسكت بخاف أرد عليه يتبلى عليا ويقول انى انا الى بدئت كلام معاه
- انا بمشى كأن محصلش حاجه بخاف من الفضيحه الى ممكن اجيبها لنفسى ولاهلى !!
- انا الى بيتعرضلى بتخانق معاه وسعات بصرخ وأقول ( حرامى ) والناس ما بتصدق بقى 
بس الى فاجئنى فعلا ان ف بنات شايفه ان الغلط ع البنت !! ايوة شايفين ان البنت هى الى بتدى الفرصة للولد انه يعمل حاجه زى دى سواء بقى بلبسها او ضحكتها او مشيتها وتصرفاتها .. بس لو ده تفكير البنات .. ازاى ممكن التحرش ده يختفى ؟!!
كفاية بقر بقى .. قطع ايدك .. خليك انسان
لو التحرش سببه التربية الغلط .. ابناء الشيوخ بيتحرشوا ليه ؟!!
لو التحرش سببه لبس البنت .. بيتحرشوا بالمنتقبة ليه ؟!!
لو التحرش التحرش سببه الفقر .. مدير الشركة بيتحرش ليه ؟!!
لو التحرش سببه الامية .. المدرس بيتحرش ليه ؟!!
لو التحرش سببه تاخر سن الزواج .. أبو العيال بيتحرش ليه ؟!!
لو التحرش سببه الكبت الجنسى .. اللى عنده 7 سنين بيتحرش ليه ؟!!
لو التحرش بيختفى بالسكوت والتطنيش .. بعد سنين سكوت ما اختفاش ليه ؟!!
كفاية سكوت يا بنات عن حقكوا .. مفيش حق هيرجع بالسكوت والتطنيش .. المجتمع غلط وانتى صح .. ايوة كلهم غلط وانتى الصح .. دافعى عن حقك انك تعيشى حرة .. انك تمشى ف الشارع وانتى مش خايفة .. دافعى عن كيانك وحياتك .. انتى ليكى حقوق زيهم بالظبط .. سكوتك عنها هو الى بيضيعها .. متخافيش من الفضيحه .. الفضيحه دى للحيوان الى بيمد ايده عليكى .. جسمك مش مباح للجميع .. حافظى عليه .. اياكى والخضوع يا ست البنات ..
رفقا بالقوارير يا سادة