آه يا مسكين

أحكى منين قصتنا الحلوة
والله ما عارف أقول أولها
أصل دى حاجة جديدة علينا
خلت روحنا أهى فى رجلينا
ماشية الدنيا وماشى معاها
مرة أدادى ومرة أحايل
بدعى بقلبى ربى يعيننا
علشان تمشى المركبة بينا
توصل شط سلام وأمان
وتعدى المرفأ على خير
********
اصحى يا عم اصحى يا أخينا
أنت بتحلم بعيون مفتوحة
روح كده روح
أحسن لك نام
تمشى المركب بس إزاى
قولى يا راجل أنت يا عاقل
تمشى ازاى والريس غايب
حتى الناس جواها نايمين
ليل ونهار سوا مش فارقين
أهى عتمة وفيها ناس ماشيين
طب ليه راضين !!
قولى يا عم الحاج يا طيب
هسمع منك كل كلامك
قولى وكله هيبقى فى بير
*********
طب وأنا مالى
أنا راجل غلبان وفى حالى
عندى عيال عايز أربيهم
وديون هنا وهناك
متدقش
مالها العتمة أدينا راضيين
*********
والله غريبة بجد غريبة
هما الناس مالهم ساكتيين
ودن بطين وودن عجين
حتى العين مش زى زمان
عين مطفية فى ليل العتمة
راس بتطاطى كمان وكمان
مين هيقولى كلمة حق
مين راح يرفع راسه وعينه
مين مش عاجبه حال الغلبان
*********
أنا راح أقول
أيوة هقول كلمة هترضينى
ترضى ضميرى وبلدى وغيرى
بس أوعدنى ده بينى وبينك
أصلى هقول أحوال متسرش
قول يا حبيبى السر فى بير
***********
عندنا نقص فى المسامير
راحت فين..... راحت فين
ال عجنوها فى نص رغيف
علشان بتقوى العضلات
بدل الكالسيوم والفيتامين
وأهى توصل للمعدة تمام
منها الصلب ومنها البرمة
و آدى اللقمة قروا عليها
وحليب مية بستة جنية
ولا فيه قشطة وضحكوا عليه
كله عشان صحتنا الغالية
أصل القشطة دى ضارة يا بيه
تعمل سمنة وتخمة كمان
************
آه يا مسكين
قول وأشجينى
صعبت عليا
قول فضفضلى
ما أحنا غلابة ونعمل إيه
مصوا خلاص الدم بتاعنا
حتى اللحمة يا ناس غلوها
بقى ليها ناس تانية بيكلوها
واحنا كفاية العضم علينا
نعمل شوربة نعمل عدس
كله محصل بعضه يا فندى
وأنا مجبور و آدى حال الدنيا
دقنا الذل مع الحرمان
***********************
مين ده الراجل
والله ما عارفه
هو أنا نفسى ولا أنا ضايع
وسط ركام الماضى أنا عايش
أيام الديك أبو قرشين
عايز أزعق عايز أنادى
مين راح يسمع
زحمة ووش وناس ماشيين
تحت العتمة وآه يا مسكين