إلي صلاح جاهين‏:‏ نتذكرك بشعرك

تراب دخان لقيت في جيبي قلم‏.‏ قلم رصاص‏,‏ طول عقلة الصابع‏,‏ معرفش مديت إيدي عايز إيه‏..‏ راح طالع‏,‏ أصفر‏,‏ ضعيف‏,‏ ضايع‏,‏ وما بين تراب دخان‏,‏ وقشر سوداني‏,‏ كان مدفون‏. وكنت ماشي لوحدي في الشارع‏,‏
معرفش رايح فين‏,‏ لكن ماشي‏,‏
والليل عليا وع البلد غاشي‏,‏
ليل‏,‏ إنما ليل أسود الأخلاق‏.‏
ليل‏,‏ إنما عملاق‏,‏
اسود سواد خناق‏,‏
اسود‏,‏ كمليون عسكري‏,‏ بستره خفاشي‏,‏
وجزمه ضباشي‏,‏
بينظموا السهره‏.‏
والخلق يا حسره‏,‏
الخلق مالهاش خلق للسهره‏..‏
الخلق عاملين زي عشاق كلهم مهاجير‏,‏
ومروحين مقاهير
يستنظروا بكره‏.‏
مقهور أنا وماشي
‏-‏ أصل القمر قال جاي وماجاشي‏-‏
ع النيل ماجاشي‏..‏ وماجاش كمان ع الهرم‏..‏
لفيت عليه القلعه لفيت بولاق‏,‏
قمري لقيته عدم‏.‏
لفيت عليه امبابه والوراق‏,‏
قمري لقيته محاق‏.‏
وعنيا وقعوا م السما ع الأرض‏,‏
الأرض برضه محاق‏.‏
قهاوي‏,‏ سوده من الهباب والهذر‏,‏
والراديوهات تنعب نعيب الجنون‏.‏
يا ليله من غير قمر
يا كحل من غير عيون‏.‏
ولقيت في جيبي قلم‏,‏
كأنه واد مقروض ومتجادع‏,‏
قزعه لكين ملعون‏,‏
مبري قوي ومسنون
تقولش ح يخطط نظام الكون؟‏!‏
وأعمل بيه إيه وأنا ماشي في الشارع‏,‏
أنا كمان قزعه وكمان ضايع
وكمان عليا تلول تراب دخان‏.‏
يا ميت ندامه عليكو يا صنايع‏,‏
سبع صنايع‏,‏ بس آه يا ندم‏,‏
سبع صنايع بس آه يا زمان
ارسم لي قطه يا بابا‏..‏
ارسم له قطه بتشتغل بهلوان
أكتب لي اسمي يا بابا‏..‏
أكتب له اسمه بخط مرعوش حنان‏.‏
اديني قلمك يا بابا‏.‏
اديله قلمي يشخبطه ع الحيطان‏.‏
وشيلني أوبح يا بابا‏..‏
أشيله علي صدري كما الصولجان‏!‏
كان القمر أيامها طفلي أنا‏,‏
وعليه زغب ناعم كمثل الطير‏,‏
واخضر كأنه لمونه م البنزهير‏,‏
وكنت اشيله‏,‏ وافرجه لكل حي‏,‏
اتفرجوا‏,‏ شوفوا غلاوة الضنا
والناس يقولوا اسم الله خير والله خير‏,‏
يا رب خليه لك‏..‏
الرب خلاه‏..‏ بس مش ليا‏,‏
ضاع القمر مني وانا غفلان‏,‏
وصبحت يا إخوان‏,‏
لابد ما يتشحتفوا عنيا
علشان أطول منه شعاع من ضي
واديني ماشي لوحدي في الشارع‏..‏
معرفش رايح فين‏,‏ لكين ماشي‏,‏
والليل عليا وع البلد غاشي‏,‏
ولقيت في جيبي قلم‏..‏
كتبت به غنوة عذاب‏.‏
المقابر
باحب المقابر‏,‏ واموت في التراب
هناك‏,‏ زي حي الغناي في الهدوء الجميل
هناك زي شط البحور‏,‏ في النسيم العليل‏,‏
هناك العجب‏.‏
هناك تمشي تسمع لرجلك
دبيب عالي يرضي الغرور‏,‏
هناك كله راقد‏,‏
مفيش غيرك انت اللي واقف فخور‏,‏
وأما الزهور‏,‏
هناك بالمقاطف علي الأرض‏,‏
يا مسروقة يا بتحتضر‏,‏
تجيب أدوات العطور‏,‏
وتصنعها عطر اسمه مثلا‏:‏ عبير العبر‏!‏
تبيعه‏,‏ وتكسب دهب‏.‏
وتدهس علي العضم‏,‏ وتقول كلام فلسفة‏,‏
وتملا كتب‏.‏
ده غير الثواب اللي تقدر كمان تكسبه‏,‏
من الفاتحة ع الميتين‏.‏
فمنها عباده‏,‏ ومنها استفادة‏,‏ ومنها أدب‏,‏
لهذا السبب‏,‏
باحب المقابر لكين‏,‏
بعقلي الرزين‏,‏
بأحب البيوت‏,‏ واللي فيهم‏,‏ زيادة‏!‏
اتنين صباحا
النور ملو الشوارع‏,‏
ومليون راديو والع‏,‏
الساعة اتنين صباحا‏,‏
لكين إيه الموانع‏!‏
‏..‏ الخلق رايحه جايه‏,‏
والدنيا لسه حيه‏,‏
مليانه بالهأو أو‏,‏
وزعيق القهوجية‏.‏
‏..‏ واحد يقول لواحد‏:‏
خليك يا عم قاعد‏,‏
التاني يقول له‏:‏ شكرا‏,‏
ده انا م المغرب مواعد‏,‏
فيه سهره لسه عندي‏,‏
في بيت فلان افندي‏,‏
ح ناكل حاجة حلوه‏,‏
ونشرب تمر هندي‏..‏
واللي تروح دالقه جردل‏,‏
فوق حضرة المبجل‏,‏
طبعا صاحبنا يزعل‏,‏
وينفجر شتايم
والحي كله يوصل‏,‏
مابين مصلح ولايم‏,‏
اللي يقول‏:‏
يا جماعة
واللي يقول‏:‏ يا بهايم‏..‏
ومطرب الاذاعة‏,‏
يصرخ‏,‏ وف وجده هايم‏..‏
ولو طرطقت ودنك‏,‏
في وسط دي العظايم‏,‏
تسمع مسحراتي‏,‏
بطبله صوتها واطي‏,‏
بيقول‏:‏ اصحي يانايم
رد
الشارع قال للحارة‏:‏
إخييه‏..‏
ريحتك طعميه‏,‏ وفول وبصارة‏..‏
آييياه‏..‏
كل بيوتك بغدادلي
مافيهاش تكييف
وبيبانك نازله لتحت‏,‏ بدال ماهي طالعه لفوق‏,‏
ولا حتي ليكي رصيف‏,‏
ستاتك بلدي‏,‏ وليل ونهار ع العتبه
قاعدين كده جوق‏..‏
رجالتك نكته وعجبه‏,‏
ولا يعرفو ذوق‏,‏
وعيالك دول‏,‏
نسانيس مقاصيف الرقبه‏,‏
الحاره ردت رد‏..‏
خلي الشارع ينسد‏!‏
طرزان
يوم الخميس‏,‏
واللب‏,‏ والأحلام‏,‏ في كيس
طرزان بيغطس في الهويس‏.‏
طرزان جدع‏,‏
طرزان شديد‏,‏
دراعه أجمد م الحديد‏.‏
قزقزت نص اللب‏,‏ هاه‏..‏
طرزان بيصرخ‏:‏ عا عا عاه‏..‏
خنق الأسد‏,‏
طحن الدماغ‏,‏ عجن الجسد‏..‏
قرقشت باقي اللب‏,‏ من غير قزقزه‏,‏
طرزان صرخ قال‏:‏ عاعاعاه‏..‏
صرخت أنا كمان وراه‏.‏
ولما قال لشيتا‏:‏ يا امه زغرطي‏..‏
وحط رجله ع التعيس‏,‏ فوق التراب‏,‏
حطيت معاه رجلي‏,‏ بدون جزمة وشراب‏,‏
ورسمت بعيون الخيال‏,‏ بدل الأسد‏,‏
محمود أفندي حسين‏..‏ مدرس الحساب‏!‏
المرافعة
حلمت الليلادي‏,‏ بإني في موقف رهيب‏,‏
بأقول‏,‏ والكلام مني طالع نحيب
سيادي القضاه‏,‏
دفاعي بسيط‏.‏
كلامي ماهواش غويط‏,‏ وماهواش عبيط
بسيط‏,‏
بساطة هدوم الغلابا الفقاري الحفاه
بسيط‏,‏ زي اسم صديق علي شفة صديق
بسيط زي دمعة بريء‏,‏
بسيط زي وحش جعان في الفلاه‏,‏
بسيط زي حفنة دقيق‏.‏
سيادي القضاه‏,‏ يا ذمم يا همم يا قمم ياعتاه‏,‏
دفاعي قوي‏.‏
قوي‏,‏ زي صرخة غريق‏,‏
بينده لقارب نجاه
بينده بآخر قواه‏,‏ للحياه
دفاعي قوي زي دقماق حديد‏,‏
قوي زي نظرة وعيد‏,‏
قوي زي تمثال اله‏,‏
قوي زي بلطة رجال الحريق فوق بيبان الحريق
سيادي القضاه‏,‏
سيادي الكرام العظام الفخام العلاه‏,‏
دفاعي مؤيد‏,‏
مؤيد بكل الكلام العظيم‏,‏
بتواره‏,‏ بإنجيل‏,‏ بمزامير داود‏,‏
بقرآن كريم‏.‏
دفاعي مؤيد بكل أنين الكمنجات في كل الوجود
بكل حفيف النسيم‏.‏
بتهنينة الأمهات للعيال في المهود‏,‏
بصوت القبل‏,‏
وكل ابتسامة بحق وحقيق‏,‏
تؤيد دفاعي‏.‏
وبارفع صباعي الضعيف وباقول كلمتي
سيادي القضاه‏,‏
سيادي الحدادي اللي حايمة علي رمتي‏,‏
ح اقول كلمتي‏.‏
لكين قبل ما انطق واقول كلمتي
قولولي انتوا‏.‏ إيه تهمتي‏..‏ ؟؟