احنا الشعب الوحيد اللى!

احنا الشعب الوحيد اللى سكن على الأرض الزراعية، وراح يزرع الصحراء.
احنا الشعب الوحيد بياكل صنفين على الفطار والعشاء هما الفول والطعمية، بالرغم من أنهما صنف واحد، وصدق المثل الطعمية من الفول والفول من الطعمية.
احنا الشعب الوحيد اللى عشان خوفه من الحسد دايما تلاقى ظروفه صعبة ودايما الحالة واقفة، ولو سألت أى تاجر أو أى موظف أو حتى عامل باليومية عن حال البلد يقولك زى الزفت لكن لو دخلت أى هايبر ماركت مش هتلاقى مكان لقدم فيه وممكن تقف على الكاشير ساعة كاملة لحد ما التاجر والموظف والعامل اللى باليومية يحاسبوا على الشيكولاتات والعشرين نوع جبنة والثلاثين نوع لانشون والخمسين علبة سجاير والسبعين نوع عصير إلخ..
احنا الشعب الوحيد اللى سمح بترشيح شخص لمنصب رئيس الجمهورية بالرغم من أنه هارب من السجن والشرطة نسيت تدور عليه لا والمصيبة أنه بقى أول رئيس جمهورية فى العالم هارب من السجن .
احنا الشعب الوحيد اللى انتخب بعض منه رئيس للجمهورية عشان الشخص ده ملتحى وحافظ القرآن طب مالشيخ على جمعة كان أولى بالرئاسة على الأقل راجل بيفهم فى الدين، ودقنه أطول وبيلبس دايما عمة وقفطان .
احنا الشعب الوحيد اللى فيه الدكتور لازم ولاده يبقوا دكاترة والمهندس ولاده مهندسون وحتى دكتور الجامعة سبحان الله لازم ولاده يبقوا متفوقين ويطلعوا دكاترة جامعة بردو وفى نفس القسم والغريبة بقى أن العامل لازم ولاده يبقوا عمال والتاجر ولاده تجار وحتى الممثلين والمطربين ولادهم بيطلعوا زيهم لكن تيجى بقى لحد الرئاسة تلاقى كل اللى فاتوا دول وفى نفس واحد يقولك لا للتوريث..... ؟
احنا الشعب الوحيد اللى بنكره الواسطة ومع ذلك بنلجأ إليها فى أصغر مشكلة تقابلنا فلو مثلا كنت من أشد الناس كرها للواسطة واتمسكت فى لجنة عشان الرخص منتهية أول حاجة هتعملها هتتصل بجارك سيادة الرائد فلان أو زميلك فى الثانوى المستشار فلان أو حتى الفنان الكبير فلان، وهكذا وتطلب منهم التدخل بالواسطة لإنقاذك من الورطة ويا سلام بقى لو الظابط تمسك بالقانون؟ هيتعمل فيه زى ما عملت المتهمة سيدة المطار فى المحترم ضابط المطار.
احنا الشعب الوحيد اللى أغلب السيدات فيه محجبات بحكم المجتمع والتقاليد مع أن الحجاب أمر إلهى للسيدات المسلمات المتدينات حتى يعفهم ويحافظ عليهم ويظهر تدينهم والتزامهم بعفة اللسان وخدمة المجتمع والنصيحة المخلصة، ومع ذلك تجد أن الكثير من المحجبات فهموا أن الله يأمرهم فقط بتغطية الجزء العلوى من الجسم، ولذلك هم يفعلوه إرضاء لله أما تعرية الجزء السفلى أو لبس الإستريتشات المجسمة هى إرضاء لعباد الله ولا حول ولا قوة الا بالله وبعد ده كله بيقولك ليه التحرش انتشر .. حتى مع المحجبات؟
احنا الشعب الوحيد اللى دايما بيتآمر عليه كل الدول الاستعمارية ومع ذلك دائما يخرج منتصرا فمن التتار والصليبيين إلى الفرنسيين والإنجليز وصولا للصهاينة والأمريكان كانت دائما ما تنتهى هذه القوى الاستعمارية على يد الشعب المصرى.
احنا الشعب الوحيد اللى بيتسرق من 7000 آلاف سنة ومازال تملؤه الخيرات.
احنا الشعب الوحيد اللى دهن الهواء دوكو وفيش الهوامش وغنى للقفا وبيضحك فى وسط العزاء وبيحب المغشوش والأصلى ميعرفوش وبيخاف من الغولة أم عين حمرا بس بيعرف يسخر الجن والعفاريت وفأيده الكاس وبيلعب قمار وبيقول يارب أكسب وتبقى آخر مرة والرقاصة دايما تلاقيها بتقول إن شاء الله وبإذن الله وبسم الله ماشاء الله وخمسة فى عين العدو ودائما ما تجد الكنيسة والمسجد فى نفس الشارع هذا يدق الجرس وهذا يعلى الأذان وكل فى بوتقة منصهرين ولن يتفرق هذا الشعب أبدا مادامت تجمعه هذه الصفات المتناقضة وهذه الأرض المباركة إلى يوم الدين.