شباب "فيس بوك" يتوصلون لنظرية "البطاطس"

في الحياة خليك بطاطس .. "مقرمش" من بره بس أبيض وطري من جوة، "مش معقد" تقعد في مطعم أو تقف على عربية فول، "مرن" يعني تبقى شيبسي، بيوريه، محمر، صينية حتى، المهم ما تبقاش حاد وصلب، وتعدي من الأزمات وما تخليش حاجة توقفك، "أصيل" معدنك ما يتغيرش مهما شوفت أو قابلت في طريقك، يعني باختصار كده خليك طيب، ومتواضع، وقوي، ومحبوب من كل الناس.
ومن أجل اكتساب هذه الصفات عليك قراءة نصائح الفيلسوف "بطاطس" على صفحة فيسبوك "نظرية بطاطسية .. خليك بطاطس"، والتي ستجعلك تنظر بعين جديدة للحياة، وستكسبك مهارات التعامل مع الآخرين.
والنظرية تقوم على خمس نصائح "بطاطسية" :عارف إيه أحلى بطاطس؟ البطاطس المحمرة إلي بتبقي مقرمشة من برة، وطرية من جوة، عشان كدة لما حد يعمل معاك موقف سخن أوي ماتعملهوش وحش أوي ..أيوة حسسه إنك زعلان منه وخد موقف، بس خلي قلبك أبيض، وطري "طيب" يعني مش ناشف، وسامح عشان ربنا كريم أوي وبيسامح.
ماتتكبرش علي حد وصاحب كل الناس غني أو فقير، زي البطاطس المحمرة كده بتلاقيها عند ماكدونالدز "فرينش فرايس"، وبرضه بتلاقيها عند بتاع الفول والطعمية يعني إنت كمان خليك زيها.
احتفظ دائماً بشخصيتك المستقلة، وطريقة تربيتك، وخلي الناس هيه اللي تتأثر بيك، مهما اتعرضت لثقافات وبيئات مختلفة، زي البطاطس المحمرة كده بتتقدم مع حاجات كتير: مايونيز، كاتشب، صالصات مختلفة، وساعات كمان بتتقدم مع طحينة، بس بتفضل في الآخر اسمها "بطااااطس.
خليك جدع زي "الشيبسي"، البطاطس الشيبسي هي أول حاجة بنفكر فيها لما بنحس بالجوع، وإحنا برة البيت، فساعد الناس دايماً، وخليك أول واحد ييجي علي بالهم لما يقعوا في مشكلة.
خليك طيب وخير مهما الدنيا فضلت تهرس وتبهدل فيك، زي البطاطس المحمرة كده لو اتهرست بتبقي برضه طعمها حلو ولذيذ، وساعتها بنسميها "بطاطس بيوريه"، فمهما شوفت من الدنيا طلعلها لسانك وقولها أنا "بطاااطس بيوريه".