"حرية والتجربة" قصيدتان جديدتان للشاعر ياسر أبو جامع من ديوانه "حد شبهى"

عشان خاطرك
أبيعلك نفسي قطاعي
وألملم كل أوجاعي
وأعلقها علي دراعي
واقول :ياصبر سندني
وإسندني لما أميل
يجيني الصبر يتمخطر
وحاطط إيده في جيوبه
يقولي جتني متأخر
خلاص المر متسطر
علي جبينك وهدوقه
ألاقي ضلوعي تتكسر
وتوقع مني أوجاعي وتتبعتر
وألاقيني بلا داعي
أشوفك تاني بسمة نيل
وأرسم عينك العسلية
ضل نخيل
وأشوف ف الشعر
قلب الليل
وأشوف عودك بيتمايل
مع المواويل
وأتصاحب علي خيالي
أشوفك بنت خمرية
م خطرت يوم علي بالي
وياخدني الحنين ليكي
أسمع ضحكك العالي
بطعم الشفة وردية
ميدان مليان بحرية
وكان ياما كان
"حكاية من حكاوي زمان
أمير مسحور...ومحبوس ف القفص
عصفور..
وست الحسن بتغني لشط النور
يدوب السحر في غناها
كأنه ما كان"
وكان ياما كان
التجربة
الشعر دار دورته
والتجربة وقعت صادقه فى حجرك...
إلي الشاعر محمود سباق
"التجربة"
القول كتير
لكن الحكمة متطلعش غير من صدر التجربة
كيف يعنى تخلى الكلمة
تشقق قلب اللى بيسمعها
من غير ما تكون كفك
شققت من شيل "الكريك"
كيف يعنى تهد خراب الكون
وتبنى منه بيوت مليانة جمال
من غير ما يكون
هذا الخراب بكاك كتير
كيف يعني يبقى البراح سقفك
من غير ما تكون
مجروح بضيق المكان
التجربة يا أيها "الإنسان"
هى اللى بتهدى القول
بيطلع بعدها معدول
فيسكن قلب من يسمع
ويشبع بال...
خلاصة القول:
الشعر دار دورته،
والتجربة وقعت صادقه فى حجرك.
الموضوعات المتعلقة..
ياسر أبو جامع يجمع التفاصيل الإنسانية فى ديوان "حد شبهى"