لسه بيعافر

فى حديثنا اللا منتهى عن جيل التمانينات وهو آخر جيل استمتع فى الكوكب دا، بتلاحظ أن كل الكوكب موافقك فى الرأى ده.. مثلا لما تحب بيبسى تعمل إعلان ناجح فى رمضان لازم يكون فيه ذكريات جيل التمانينات بس.
جيل كل لحظة عنده متعة حتى فى الابتكار.. الجيل ده وهو صغير فضل باهر العالم ومابيفتكروش ذكريات حلوة إلا ذكرياته، مثلا فوازير نيللى ولا شريهان، مازينجر ولا جريندايزر - والاتنين كانوا شبه بعض أصلا - بقلظ ماما نجوى بوجى وطمطم فيلم، حتى اللعب حتى الآتارى اللى لعبه بتنزل على ماركت الموبيلات والناس بتنزلها، يا راجل هو فى حد مايعرفش ماريو، ده إسعاد يونس نص برنامجها على جيل التمانينات.
تصدقوا إنه حسب معلوماتى البسيطة أن أشهر ناس قامت بثورة 25 يناير كانوا جيل التمانينات، ماقصدش العواجيز دول اللى ركبوا الثورة، أقصد اللى عملوها وماتوا فيها، معظمهم كان تمانيناتى.
يعنى نقدر نقول إنه الجيل اللى غير ذكريات بلد، وحاول يغير مستقبلها، تعرف أن كل ده وأكتر وبشكل يموتك من الضحك موجود فى مسرحية عاملها برضو شباب من جيل التمانينات اسمها «1980 وأنت طالع»، جيل التمانينات لسه بيعافر.