"نفس احتمالات العدم" قصيدة جديدة لمحمد شكر

ليه البيوت قضبان عنيك ؟
عمارات كتير من غير سما
حتى القمر..
دبلان على سطوح السكات
عطشان عيون..
ومافيش سواقى ب تشبهه
إنت احتمالى وقدرتى
إياك تفكر تنكسر
وتسيبنى لليل والطريق
لو خطوتك مستغرباك
أنا برضه توته وغيط حمام
وماليش مكان غير ع الورق
مستغربانى الفاترينات..
مستغرباك
مش دى المدينة..
ف الشوارع..
والميدان؟
زى الغيطان..؟
شاى المغارب؟
وحكايات الفلاحين؟
مش كلنا ب نحب بعض !!
مش كلنا ب نحس بعض !!
ليه كلنا..
زى البيوت قضبان لبعض؟
....
ب تحب ليه وسط البلد؟
مابقيتش موضة..
إنك تدوّر ف الشوارع..
ع الشوارع
وتلاقى ف بيوتها القديمة
القمح وغيطان الزمن
خليك جرئ..
وارفض تكون تابع لضلك
واسبقه
ساعتها بس ه تلقى شمسك قبلتك
يعنى احتمالات الوجود
يعنى الطريق..
يعنى الوطن..
يعنى القصيدة..
وأنا وأنت م الطين والتراب
نفس احتمالات العدم
....
أنا مستحيل..
وانت احتمال
مش مستعد أموت جبل
وتعيش سكوت
كل اللى بينى وبين طريقك
خطوتى ف ليلك عيون
ليلك براح.. وعنيك جدار
يمكن عشان سراديب ضلوعك تشبهك؟
يمكن عشان إنسان قديم؟
مستنى بكره ينكسّك..
ويموت عليك؟
لازم تقوم..
رعشة عيونك مش مطر
والخطوه مش ريح ع الطريق