نظرة يا ست

العبد لله يشهد ويبصم ويختم بصوابعه العشرة إن المرأة نصف المجتمع وفاكهة الدنيا وما ينفعش يعدى يوم المرأة العالمى من غير ما نكتب حاجة للست.
لقد اهتم سبحانه وتعالى بالمرأة وذكر سورا فى القرآن باسمها كالنساء ومريم.
وصدق أفلاطون وقال "لو أن الحقيقة صبغت امرأة لأحبها جميع الناس".
فهى إذن مخلوق عظيم الأهمية لأن الجميع يحبه ويقول أوسكار وايلد" إن النساء وجدن لكى نحبهن".
وعظمة المرأة تكمن فى كونها الأم والأم مدرسة إجازتها يوم الجمعة.
ويرى كاتب المقال أن الست مش محتاجة لفكرة البحث عن المساواة لأنها عايشاها، وتعالى نحسبها بالورقة والقلم ونشوف.
عندما يأتى شهر مارس تحتفل المرأة بيومها العالمى والرجل ليس له يوم احتفالى أو حتى مولود صغير كده يفرح فيه.
عندما تتجه لمكان عملك وفجأة تلاقى نفسك قصاد المترو والباب بيقفل بس ما تقدرش تدخل لأن العربة مخصصة للسيدات وساعتها تنتظر المترو اللى بعده يا رجل.
عندما تشاهد الأفلام تجدها تؤكد على صدق النساء من اسمها زى "الستات ما يعرفوش يكدبوا"، حتى الأغانى والبرامج طلعت علينا ب"الست دى أمى" وجوائز الأوسكار اكتسحتها النساء يعنى شمال يمين تلاقى واحدة ست.
سيبك من كل ده بس ممكن تضيف شوية بهارات وتوابل عشان الطبخة تطلع كويسة فإذا أردت أن تعذب أحدا فاتركه مع المرأة وهى ذاهبة لشراء ما يخصها وتأكد أنك ستعود خالى الجيب منزوع القوة بس شايل شىء وشويات ولا حاجة فيهم تبعك غير فلوسك اللى دفعتها يا سيد.
عفوا ذكرت فى البداية أن الموضوع عن المساواة التى تطالب بها المرأة رغم أنها عايشة ومتهنية 24 قيراط من بداية ظهورها يعنى شوفناها ملكة ووزيرة وقاضية وأميرة وبنت الأيه لتامر حسنى.
طيب تعالى يا سيدى أعرفك على حكمة بتقولك: إن الله عندما أراد خلق حواء من آدم لم يشأ أن يخلقها من عظام قدميه عشان ما يدوسش عليها ولم يخلقها الله من عظام رأسه حتى لا تسيطر عليه وإنما خلقها الكريم من ضلوعه لتكون مساوية له قريبة من قلبه.
أظن يا ستى مالكيش حجة ولا تقولى بقى محرومة من حقوقك ولا مصدومة.
يعنى يا بنت الناس عندك عربيات باسمك فى المترو ومقاعد فى البرلمان بتاعتك ومجلس قومى على اسمك ده غير عيد الأم اللى انكتب باسم ست الحبايب واسم الراجل بس يظهر وقت شراء الهدايا وادفع يا بابا .. يا عينى يا بابا.
ربما تظهر المساواة بين الرجل والمرأة عند دخول الحمامات العامة، حيث نجد واحدة للرجال فقط وأخرى للسيدات فقط.
سيدتى العزيزة أعتقد أن الرجل لا يوجد شىء مسمى على اسمه وربما سنسمع عن مظاهرات للرجال تنادى بالمساواة ده حتى ربنا كفل للستات حقها وقال (الرجال قوامون على النساء) ومعنى كلمة قوام فى اللغة خدام ولو عايزين تتأكدوا أسألوا الشيخ خالد الجندى.
وعيشى حياتك يا ست بس نظرة للغلابة لو سمحت.
نسيت أقولك كل سنة وإنتى طيبة فى شهر مارس من أول يوم المرأة لحد عيد الأم وما تنسيش كاتب هذا المقال يتم عشرين فى هذا الشهر.