كراسى السلطة

كراسيكم ماتنفعنيش
وهيه كمان ما تلزمنيش
ومالها القعدة يا عنيه
على السجاده
أفرد فيها رجليه
وقدامى وسع وبراح
أمدد فيه وانا مرتاح
وقدامى الولاد قاعدين
على الطبليه متحاوطين
وطبق الفته قدامهم
وجوز م البط متحمر
فى صحن كبير ومدور
ساعتها أشمر اكمامى
وابسمل للى أعطانى
نقوم بالأكل على أخره
ونحمد ربى على نعمه
واتمدد وأنا مكانى
وأنام مرتاح بدون كوابيس
كراسيكم ياناس ديه
ما تلزمنيش
.............
أنا طول عمرى مش مغرور
ولا باحلم بكرسى قصور
ولا حتى بكرسى سرور
ولا كرسى لأى وزير
كفايه عليه انى غفير
قاعد فى أرضى ليل ونهار
وطول الليل واقف زنهار
بأحرسها من الشطار
وكل خسيس يحوم ع الدار
عاوز يسرق فى قوت ولدى
وينهب أرضى مع بلدى
وانا يا ناس بالبلدى
باقول اشعار
مع تحابيش
كراسيكم ياناس ديه
ماتنفعنيش
...........
ومالها القعده فى الغيطان
قاعد مرتاح لابس قفطان
وجنبك قله مليانه
يكركر منها العطشان
وراكية نار
عليها براد
وزردة شاى للسهران
وناى بصوابعك الحلوه
يقول أنغام
تسللى القعده تبقى تمام
وقمره حلوه فى العالى
تطل عليك
وتسمع صوت من الكروان
ينادى عليك
يقول لك ياحبيب الروح
اوعى تروح
ومن قربك ما تحرمنيش
كراسيكم ياناس ديه
ما تنفعنيش