الجنرال توفيق.. والعميد..!!

فى أمثالنا الشعبية قالوا: قيراط حظ ولا فدان شطارة.. وقالوا برضوا: أدينى حظ وأرمينى البحر..
وقالوا: المنحوس منحوس..
وأعتقد أن أكتر ناس فى مصر بل وفى العالم كله مصدقين الموضوع دا ومتأكدين منه هما الزمالكاوية..
فكل مرة بيلاعبوا الأهلى بيكونوا متأكدين تماما أنهم هيتغلبوا هيتغلبوا حتى لو عملوا إيه.. كل مرة يقولوا هنكسب والزمالك قادم والمرة دى مش زى كل مرة وبرضوا مفيش فايدة.. هزيمة تتلوها الهزيمة والجمهور العظيم صابر وبيصبر نفسه بصبر المتصبرين وبيدعى ربنا يفك أزمته وزنقته ويفوز على الأهلى ولو مرة.
يلعب الأهلى بالناشئين ويكسب.. يلعب بعشرة لاعبين وبرضو يكسب.. يلعب الزمالك بفريق الأحلام ويخسر.. يلعب بفريق عادى وبرضوا يخسر.. يفضل الزمالك يشترى لاعيبة بالملايين ويغير فى المدربين العالميين هولمان وكرول وديكستال والمدربين المصريين العالمى والعميد ويغيروا مجالس إدارات مرة انتخابات ومرة بالتعيين.. وبرضوا مفيش فايدة وبينطبق عليهم دايما مقولة.. خربانة خربانة..
يلعب الزمالك أحسن مبارياته والحظ يقف ضده كور فى العارضة والجون يصد وفجأة الحاج أبوتريكة ينهى المباراة بشوطة من فاول أو ضربة رأس تخبط فى مدافع وتغير اتجاهها وتخش الجون وزيه بركات ومتعب.. يفضل الزمالك يحاول ويحاول للمكسب وفجأة تتشاط كورة ملهاش لازمة تخبط فى أحمد توفيق لاعب الزمالك وتخش جون ويخلص الماتش على كدا.. يلعب الزمالك ويبقى كسبان وفاضل على نهاية المباراة دقيقة.. يخطف الأهلى التعادل.. فيموت ويتشل جمهور ولاعيبة الزمالك بحسرتهم.. وآخر حسرة لجمهور الزمالك كانت مباراة السوبر الأخيرة.. الماتش متكتف ومقفول وشوطة فى العارضة من هنا ومن هنا.. ووصلنا لضربات الجزاء.. يتألق الشناوى ويصد ضربتين جزاء من أمهر اتنين فى النادى الأهلى.. أحمد الربعاوى ووليد سليمان.. والماتش خلاص رايح لزمالك يجى الجنرال توفيق ويقف كالعادة مع الأهلى ويضيع الزمالك ىخر ضربة جزاء فى القائم.. يعنى لا صدها الجون ولا حاجة.. لا بالحظ وبالصدف.. الجنرال حظ توفيق وقف مع الأهلى وقاله أكسب كمان وكمان..!!
أما العميد فأعتقد أنه يوم بعد يوم بيثبت أنه بتاع كلام وبس.. مرة يتغلب فيخرج يقولك أصل الفرقة معرفهاش واللاعيبة مفروضة على.. طب ياعم ما أنت مسكت الفرقة سنة بحالها قبل كدا وبرضو أتغلبت ومخدتش أى بطولة.. يقولك طب أنا هأكسب المرة دى أنا بجهز فرقة وهتشوفوا الزمالك هيبقى عامل أزاى والزمالك قادم.. وبرضو مفيش جديد عند العميد.. هزيمة هتتلوها هزيمة.. وهيرجع يقولك أصل الحظ مش معانا.. ماشى ياعم الحظ مش معانا وإحنا عارفين كدا.. طب بس أنت عملت إيه عشان تكسب ؟؟ ولا حاجة.. نازل يدافع وبس.. مدرسة الجوهرى.. رص حداشر لاعب ورا وسيبها على الله.. ويقعد بس ينفخ ويسخن فى اللاعيبة.. وخطط مفيش وتغيرات مفيش وابتكارات مفيش.. فى فتى وبس.. يعنى كوفى يلعب مساك ليه وأنت عندك نص دستة مساكين.. دويدار وحمادة طلبة وإسلام جمال وياسر إبراهيم وبازوكا.. وبعدين أحمد عيد ممسوك ومقفول عليه طب ماتشيله وتنزل بمؤمن ولا مصطفى فتحى.. لا بيغيره آخر خمس دقايق بناشئ أول مرة يلعب مع الزمالك.. وبعدين بيغير أيمن حفنى صانع اللعب برأس حربة عشان يبقى عندك اتنين راس حربة من غير صانع لعب.. وعايز تكسب طب أزاى؟؟
كلمة أخيرة للجماهير العظيمة.. أصبروا وماصبركم إلا بالله.. العيب فى الفانلة مش فى اللاعيبة ولا الإدارة ولا فينا إحنا.. أنزلوا بشعار.. سنظل أوفياء.. أو خلوا الشعار الجديد.. أهو أحسن مانبقى زى سوريا ولا العراق..