شعب سلبى قاعد ع النت!

مجتمع سلبى قاعد ع النت يعمل لايك وشير لفيديوهات وصور بنجاحات الناس التانية، وبيقول رأيه بأنه بيهوهو ع الفيس بوك أو تويتر أو المواقع الاجتماعية.طب وبعدين؟ كفاية هجوم على بعض؛ ناس أحب أقولها موتوا بغيظكم والسيسى رئيسى ورئيسك ولو مش عاجبك روح بلد تانية.
زى ما استحملنا مرسى وأدناله فرصة ادوا السيسى فرصة لكن أسلوب الهجوم ده على كل حاجة يا شعب زياط وربط أخلاق مجتمع برئيس لسه متعين يبقى تخلف؛ العيب عليك أنت لأن اللى زيك كان واقف يتفرج ويقول رايه من بعيد.
الهجوم اللى لا بيصلح ولا بيفيد هو اللى جايبنا ورا..من رأى منكم منكرا فليغيره بنفسه..شايف حاجة غلط فى البلد كل الناس بتقول رايها ع النت ورايك مش، وأصل ويمكن مسموع بس لسة مش واخد اهميته.
ابدأ أنت بالتغيير مش لازم التغيير ييجى لحد سيادتك، مش مرسى ولا السيسى ولا غيره اللى هايغير البلد، لن يغير الله ما بقوم حتى يغيروا ما بأنفسهم.
بدل ما تشارك فى مظاهرة لإسقاط السيسى (ياهبااال خد فشار) جمع الناس ديه واعمل توعية عن التحرش أو عن أى حاجة ماشية غلط فى البلد...بدل ما أنت قاعد تهاجم اللى بيهاجم فى السيسى، روح غير فى بلدك وساعد السيسى اللى بتحبه البلد تبقى أحسن عشان مش هايزق البلد لوحده هو محتاج الناس اللى بتحبه عشان يثبت للعالم إن فعلا أنت وغيرك اخترتوه... بدل ما تهاجم السيسى روح هاجم صحابك وزمايلك ونفسك ع الغلطات اللى حتى لو صغيرة لو اتصلحت يمكن تغير حاجة فى البلد، أنا آه انتخبت السيسى بس ده لا يمنع أنى با هاجم الطرفين المؤيد والمعارض، لأن الأخلاقيات ديه بتاعة مجتمع، مش لما يبقى مرسى الرئيس يبقى مؤيديوه هم اللى كويسين طالما أنت منهم ومش لما يبقى السيسى رئيس يبقى مؤيديوه هم اللى كويسين عشان أنت منهم. ناس بتتخانق على شخص وناس تبحث عن وطن... شعب سلبى!