نازل أترشح

الشعب بيفرح ليه
وأنا نازل أترشح أحيى الأمل
الشعب أمرنى ما بيهزرش
فى أمنه وبلده ما بيفرطش
وجرحه قديم وما بيدبلش
وعمره يا مصر ما جرحك دبل
فأنا لازم أترشح أحيى الأمل
اتنين رؤسا ما خدوش غلوه
لما أمرتوا وبروح حلوه
مسيحى ومسلم ألفوا غنوه
وكسروا وراهم كل القلل
وطلبوا أترشح وأحيى الأمل
يا بويا وأمى ويا أخت الشهيد
هناخد بتاره ونحرق بناره كل الوعيد
ونحبط خططهم ونهزم حيلهم بإيد من حديد
ونمحى آثارهم وكل الشلل
وأنا نازل أترشح أحيى الأمل
يا جماعة الرعب خلاص أنا ناوى
أخلص منكوا يا أس البلاوى
وأنا أد التحدى وكمان أنا غاوى
أشيل ربعواى وأشيل العلل
وأنا نازل أترشح أحيى الأمل
ياما تعبنا وياما شقينا
وساعدنا الجار واغتال أهالينا
ورد جميلنا بحرب ف سينا
وحربة بقت للخيانة مثل
فأنا لازم أترشح أحيى الأمل
يا مصرى يا أصلى كلامك وصلّى
وأعاهدك بدمى ومهما حصلّى
لاحفظ جميلك وأصوم وأصلى
واتعب لأجلك ومن غير كلل
أنا نازل أترشح أحيى الأمل
أعاهدك أصونك
وعمرى ما خونك
واسدد ديونك قوام بالعجل
واجند جنودك
وأحشد حشودك
وارجّع حدودك أمان يا بطل
وأنا نازل أترشح أحيى الأمل
يا شعبى حبيبى أمامك سور
وأنا موش مارد ولا مسحور
لكن قلبى جرئ وجسور
ما فيش معجزات، لكن تضحيات
لا مستحيلات، لكن إنجازات
تدوس ع الخيبه وترجّع الهيبة
لمصر الحبيبة
وها نعبر لخيرها بجهد وعمل
وادينى باترشح وأحيى الأمل