سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
مايكل نجل الشهيد طلعت بسوهاج: "اتصلت بأخى "نشأت" قبل الحادث بثلاثة أيام.. وقلت له خلى بالك من أبوك.. ولو حدث له مكروه مش هاسامحك.. وكنت بفكر اترك الكلية وأسافر بدلا منه ليرتاح بعد 25 عاما شقاء وتعب
أكد مايكل الطالب بكلية التمريض جامعة سوهاج، نجل الشهيد "طلعت صديق بيباوى"، " أن والدى كان يسافر إلى ليبيا من أيام السادات ثم أيام مبارك، ولم يحدث له ولباقى أقاربى مثلما حدث، ولما جه عصر الإخوان والعصر الحالى بقى المصرى فى أى بلد ملهوش كرامة يتقتل ويتخطف ويموت ويحصل فيه كل حاجة وكل ذنبه أنه مسافر علشان يجيب قوت عياله مش أكتر عشان ملقيش يوكلهم هنا". وقال: "إحنا أسرة مكونة من 3 أولاد، و3 بنات، والدى سافر وأخد أخويا نشأت معاه علشان يصرفوا علينا، اتقتل أبويا وهرب أخويا نشأت من مكان القتل، وهو اللى بلغ قرايبنا فى ليبيا اللى دوروا عليهم ولقيوهم مقتلوين، وأنا كل اللى عايزه هو حق أبويا وولاد عمى، وعايزين السيسى يعمل زى ما عمل السادات لما حصلت واقعة السلوم وميرحش دم أهلينا هدر، وأنا قبل الحادث بثلاثة أيام اتصلت بنشأت أخويا وقلتله خلى بالك من أبوك، وخليه ينزل وأنا هاترك الدراسة واسافر اشتغل مكانه، وقلت لنشأت أخويا لو أبوك حصله حاجة مش هاسمحك قلبى كان حاسس وربنا أنه هيموت بالطريقة دى، وهما كانوا عاملين عوده للبلد خلال 3 أيام بس الغدر مدهمش فرصة، دخلوا عليهم الحوش وسألوا فين المسيحيين اللى هنا وكانوا 3 ملثمين وقتلوهم فى الجبل منهم لله.. عايز حق أبويا، عارف اللى قتلوهم بيقولوا أنهم من أنصار الشريعة فين الشريعة ولو الشريعة مطبقة فعلا هنكون أحسن أمه فى العالم كله حسبى الله ونعم الوكيل.. راح سندنا".