تبقى أنت المصرى اللى غَزَلها..!

قصيدة "لو...IF"، للشاعر الإنجليزى "رديارد كبلنج" التى كتبتُ عام 1895 ونشرت لأول مرة فى 1910، كانت مقررة علينا فى التوجيهية سنة 1949، فى كتاب المختارات Selections، ولم يثننى ما شاع عن عنصرية الشاعر عن مواصلة الإعجاب بالقصيدة حتى وقتنا هذا، وقد وجدت أن هذه القصيدة التى قيل أن الشاعر أهداها لابنه مجندا فى الحرب العالمية الأولى لكن فُقد فى الحرب قبل أن يقرأها، فأهداها لشباب إنجلترا.
وجدت فى هذه القصيدة من الجمال والمعانى ما أعاننى على مواصلة الكتابة فى سلسلة "الأسئلة والوصايا للشباب والصبايا"، منذ بداية تحركهم نحو ثورة مأمولة، (25 يناير) وقد ترجمتها أولا إلى الفصحى فجاءت خالية من شاعريتها، ثم ترجمتها إلى العامية المصرية الجميلة فاستعادت صورها وإيقاعاتها الشعرية.
بصراحة، وبعد ثلاث سنوات شككت أن ما أردته منها قد وصل إلى شبابنا، قلت أعود أقتطف منها ما تيسر لعله يصل الآن وقد ازدادوا نضجا (ياليت).
وكما أضفت آنذاك ما تيسر ليناسب المقام أضفت الآن (فبراير 2014) ما حضرنى ليكمل الرسالة.
أولا: مقتطفات من كبلنج إلى الشباب
(1) لو يعنى قدِرت تكون واثق إنك ناجحْ
مع إن الكل شاكك إنك ما أنتشْ فالحْ
تقوم أنت تكمّل مش هامّك.
تفضل صاحى: ترصد تلقط كل ما همَّك!
(2) لو تقدر تستَنَّى كفايةْ، من غير ما تْمِلّ.
لو تستحمل ألاعيب الكدب: من كل الكل
ولا تسأل فيهمْ، ولا ترضى تكون يوم زييهم.
لو يوصلْ لَك غِلّ وكُره الواحدْ منهم،
تقوم أنت برضه ما تكرهْهُمشْ
كل دهوَّه، ولا تتمنظر،
ولا تعمل إنك وادْ ما حصلْشْ....
(3) لو تقدر تحلم لى براحتك،
بس تخلى حلمك فعْلك محطوط تحتك
مش يسرح بيك ويسوق فيها.
يرميك فى ملاهى إللى لاهيها
لو بتفكّر بصحيح يعنى فى إللى قصادكْ
بس ما يكونشى الفكر وبسْ: كل مُرادكْ
(4) لو تستحمل إنك تسمع نَفس كلامك
"الحق"، "الجد"، "مافيش زيه"،
يقولوه أوغاد الحرامية
بطريقهْ ملويّهْ ومش هيّه
يضحكوا بيها : على شاب عبيط
يخدعوا بيها بنت هفيّه
(5) لو تقدر تتكلم عادى مع كل الناس،
وأنت يا دوبك: مالى هدومك، ما نتاش منفوش
ولو أنت مصاحب إيه يعنى "الريّس" نفسه،
وفْ نفس الوقت ما تخسرشى أيها حرفوشْ
تتبادلوا لمسة حنية،
أو كلمة حلوةْ مندّية
(6) لو ما يقدرشى ولا واحد إنّه يِمِسّك،
يكسر نِفسك، أو يخدش حاجة من حِسك
لا عدوْ يقصدهَا،...، ولا حتى حبيبْ: مش قصدهْ،
تفضل زى ما أنتا برضه
(7) لو بتقدّر: كل إنسان
سِوا عاش أو مات
ولا بتبالغ لفلان بالذات
(8) لو تقدر يا ابنى تملاها: ثانية بثانية
دى "دقيقة" بحالها، يعنى يا خويا: "ستين ثانية"
حاتعاتبك لو أنت مليتها
بحاجات ماهيش قد قيمتها
(9) لو يعْنِى قدرت تكون واعِى وْعاقلْ فاهمْ
وجميع الناس مهزوزه حواليك: عومْ عالعايم
ويقولوا عليك إنت الخايب، ذاهل، نايم !! ....
(10) لو تقدر يا ابنى تعيش فَشَلك واللى جرى لكْ،
زى ما بتعيش انتصاراتك راكب خيلكْ،
ما هى كلها خطط أنت حاطِطْها
ما هى كورة وأنت إللى شايِطْها!
(11) لو تستحمل إن إللى عملتُهْ طول عمركْ: تِشوفه يتكسّرْ
تنحنى للأزمة، وتتأثرْ
بس تقوم منها وتعافر
تبنى ما الأول وتخاطر....
(12) لو تجمَع نجاحاتك يعنى كلها على بعْضْ،
وتكوّمها كدا كومْ واحدْ
وتغامر بيها: ... :
يا "مَلِكْ" يا "كتابه"،
وتقوم "خسران"
فاتقول: "ماشى"،
ولا تنطق كلمة، ولا تزنّ لْنَا، ولا تعيّط
وكإن ما فيش حاجة حصلت،
"وإن فِضِلّ العُودْ:
اللحم يجود "!!!
(13) لو أنت صحيح كنت سامِعْنِى
ولقيت نفسك تقدر ..، يعنِى
يبقى انت الدنيادى بحالها
لأ والأدهى- واهو داجمالها - :
تبقى انت صحيح "بنى آدم"، "صُحْ"
خِلقةْ ربَك،
زى ما خلقكْ
****
ثانيا إضافة مصرية: (15 فبراير 2011)
( I ) تبقى انت الشاب اللى عمَلْهَا
تبقى انت المصرى اللى غزلْها
تبقَى انت الشاب اللى فكّرنا تانى بمصر
تبقِى انتى البنت اللى بتغنى سورة "العصر"
"إن الإنسانَ لفى خسر"
إلا انتوا حبايبى وأمثالكمْ،
بالصبر الفعل الخير النصر
دا العالم كله ويّانا،
عاَلمَ بِلاَ حصْر
بيشكلو وعى البنى آدمين
من نور الشمس لنبض الطين
كله مع بعض
بالطول والعرض
من مصر لمصر
ثالثا: ثم أضفت اليوم بعد مرور ثلاث سنوات ما يلى:
( II ) لو تسمح ترجع ويّايا شويّه شويه:
وتبص تشوف حواليك جرى إيه انت وهيّا
حتلاقى أحزاب وفرق وشلل قول ييجى ميّه
حتلاقى خراب ونزيف أشلاء كده مرمية
حتلاقى كتير من أصحابك كانوا حرامية
حتلاقى عدالة انتقالية وعدالة تانية اجتماعية
سبحان الله! طب فين عدْلُهْ!!؟ استنى عليّا
حاتلاقى "حرية" مضروبة أمريكانية
حاتلاقى "العيش" يمكن عفّن فى النملية
* * * *
رابعا: قفلة مصرية بالاشتراك مع كبلنج
( III ) لو تقدر تحمل هم الناس حتى لوحدك
لو ترفض تيأس وتواصل سعيك كدحك
يعنى تؤمر "حضرة قلبك"
وجوارحك، كلّكْ على بعضك
إنه "على الكل أنه يواصِلْ كدا بالعافية.." يعنى أمال إيه!!
مش حايبطل مهما حايحصل، ما هو كله عليه
وكده تكمّل لو حتى ما عادشى حاجة عندك
غير فعلكْ، وقتك،ْ رِضا ربَّك
تبقى حبيبتك مصر الحلوة راح ترجع لك
زى ما كانت من بدرى قوى: فجر حضارة
حاتكمّل خير وبناء وعطاء، شمس : منارة
ويعمّ الخير على كل الناس
من كل الناس وبرب الناس.