يَا تْفكّرْ زىّ ما بِنْقُولْ لَكْ، يا تْروحِ النّارْ!

أغانى للأطفال الكبار الصغار
الجزء الأول:
أنهارْ أفكارْ
ليلْ ويّا نهارْ
ورشةْ أخبارْ
والمخ بَقَى: حبّةْ أزرارْ
ياتفكّرْ زىّ ما بِنْقولّكْ،
.....يا تروح النار ْ.
.... "طب نعملْ إيهْ؟
........
اوعى تصدّق أن الفكرة كده وحْدَها صَحْ.
اوعى تصدق إنها إمَّا: كُخِّ أوْ دَحْ.
الفكرة تجيلَكْ، اوْزنْها
مش بسّ تقولْها "تدوِّنها" !!
تعرف حقيقتها بتأثيرها
وِذَا نفعْتْ، تِفرحْ: تِعْملْها
وإنْ خابت، يبقى تشوف غيرْها
فكْرَكْ مش دايْما هوّا الصحْ،
حتّى لوْ صَحْ.
ما هو فكر الناس التانيهْ صحْ!
يبقى الصَّحّيين راح يعملوا صحْ
....أحلى وأجمل من أوّل صحْ.
راجعْ فكركْ مع ناس تانيينْ،
حلوين وحشينْ،
حاتلاقى حاجات مِشْ على بالَكْ.
حاتلاقى الكون غير ما بدالكْ.
طب جرّب تُقعد فى مكانهم،
مش بس حاتشوف شَوَفانهم:
دانت حاتتخضِّ من نفسكْ
وتراجع فكرك و ِوَسَاوْسكْ
فِكْرِ التانيين ثروة خْسارهْ
تفلتْ منَّك كده يا سَمَارهْ
.....
ماتقولشِى عليهْ دا كلامْ فارغْ،
مشْ يمكنْ أنتَ المِشْ سامِعْ
.....
الفكرة التانية المنبوذةْ،
يمكن تلاقيها لها عوزةْ
الفكرة قيمتْها فْ تحريكْها
مش فى صلابة إِللِّى ماسِكْها
نتحركْ ناحية بعضينا،
ربنا موجود،
... فوقْ..، يا أخينا.
الجزء الثانى :
.. مش معنى كده تبقى رمادى! أو من غير لون !!!
الدنيا مشْ أبيض واسودْ
الدنيا كتير، أشكال والْوانْ،
واللى قريّب، واللى بْيِبْعدْ
كلّه بْيِتْغَيّرْ، وانتَ كمانْ !
مش معنى كده تبقى رمادى، أو من غير لونْ
لأ دا انت عليك: تبقى مِصَحْصحْ، وتكون موزونْ
أنا مش قصدى "موزون" يعنى هادى ونادى
ولا إنك تقلبها "كلامْلِكْ"، مِتْعَادْ عادِى
فتّحْ عقلك للى ما تعرفشِى كتير عنّهْ
يمكن تلقاك عايز تاخدْ حاجهْ منّّهْْ
كده تقدر تكبر وتكبّرْ
كده تقدر تفهم وتقدّرْ
تلقى الأبيض جوّا الأسود: لاتْنين حلوينْ
مش مِتساويينْ، لأّّهْ دا مصنع للبنى آدمينْ
مش يمكن يا ابنى دَهْ معنى: "إننا من طين"!؟
فاكر لمّا كنا بنصطاد بالدود تعابين،
وسَمَك بُلطى!!؟؟
ياللا نْخطّى
اوعى تْوَطّى.