بعد الموجة الباردة.. الجاكت الأفضل.. والبلوفر تقيل على قلب المصريين

برودة الجو وانخفاض درجات الحرارة التى وصلت فى المساء إلى 5 درجات، فى أسوأ موجة باردة تشهدها مصر منذ سنوات، وقبل حلول فصل الشتاء رسميا فى 21 ديسمبر الجارى، أعتقد أصحاب محلات الملابس فى المثل القائل "مصائب قوم عند قوم فوائد"، ولكن أتت رياح الشتاء القارس بما لا يشتهى أصحاب هذه المحلات لتخرجهم من حالة الركود الذى يشهده سوق الملابس الجاهزة عموما فالبرد أجبر الناس جميعا على الاختفاء من الشوارع والالتزام فى المنازل هروبا من صقيع الشارع، ولم يتحقق مراد أصحاب المحلات فى انتعاش أسواق الملابس الشتوية الثقيلة فى ظل هذه الموجة الباردة.
"صيف أو شتاء السوق بردوا مريح" هكذا يرى خالد عبد الفتاح مدير أحد محلات الملابس الرجالى بشارع طلعت حرب، مضيفا "كنا فاكرين لما هيجى الشتاء الناس هتشترى، بس للأسف الحال نايم لأن الناس كانت مستنية البرد يدخل علشان يشتروا، لكن المشكلة أن البرد جه مرة واحدة من غير سابق إنذار"، مشيرا إلى أن الأسعار لم تتأثر كثيرا بدخول الموجة الباردة، حيث تراوحت أسعار الجواكت بداية من 300 جنيه حتى 500 جنيه.
على جانب آخر داخل شارع 26 يوليو، الذى لم تعتاد محلاته أن تغلق قبل الواحدة صباحا، استسلم هو الآخر لموجات البرد، وأغلقت أغلب المحلات به، إلا قلة قليلة منها قررت أن تنتظر زبائن الشتاء.
يقول "أسامة الرملى" أحد أصحاب محلات بيع الملابس الرجالى بالشارع "المفروض الوقت ده من السنة يبتدى ضغط شراء ملابس الشتاء، ويفضل لحد يوم 7 يناير، وخصوصا على الجواكت، لكن مع موجة البرد الشديدة دى مفيش حد قادر يطلع من بيته علشان البرد، واللى بينزل يشترى بينزل ساعة الظهر، ودى بتكون كمان مطر، مشيرا إلى أن الأسعار هذه العام لم تزد إلا بنسبة 10% عن أسعار العام الماضى، وهى زيادة طبيعية تحدث كل عام، أما "حمادة موزة" أحد العاملين بمحل "أسامة" فيقول "الضغط بيكون على السترات أكتر من البلوفرات خصوصا الجلدية، وكمان بيكون فى ضغط على ال(سوى تشرتات)، ودى أسعارها زادت شتوية علشان فى عليها سحب دلوقتى، لكن البلوفرات غير مفضلة لدى المصريين، لأن عامة الشعب مبيحبش البلوفرات بيحب الجواكت، لأنه بيحس أن البلوفر تقيل على قلبه".
"حمادة صابر" أحد العاملين ببيع الملابس الشتوية بمنطقة "الوايلى" قال "الحال كان نايم اليومين اللى فاتوا ومحدش كان بيشترى، بس دلوقتى فى ناس بدأت تيجى وتشترى، بعد ما البرد دخل فجأة، بس أسعار الجواكت زادت لأن الضغط عليها هى، والجاكت أبو 150 بقى ب200 وب250 ده غير الحاجات الأغلى، لأن موجة البرد المفاجأة رفعت سعر الملابس الشتوية من 10 إلى 20 %، وهو ما يعتبر أمر طبيعى خاصة مع نزول موديلات جديدة، مشيرا إلى أن سعر البنطلونات الجينز العادية يبدأ من 150 وحتى 250.