في الإسكندرية: «دفا الغلابة فى سوق المستعمل»

البعض منا يطلق على الشتاء فصل «الشياكة»، حيث المعاطف السوداء الأنيقة و«الجوانتيات» و«الكوفيات» الثقيلة، ولكن هناك أناسا ترتعب من قدوم فصل الشتاء، خوفاً من برودة الجو، لعدم مقدرتهم على شراء «جاكيت أو غطاء»، كى يحتموا به من الصقيع، وهذا ما تقدمه سوق المستعمل، الكائنة بميدان محطة مصر بالإسكندرية، التى تفتح أبوابها، مع بداية كل شتاء، حيث يفترش الباعة أرصفته، لعرض بضائعهم الشتوية سواء «البلوفرات»، «البنطلونات»، أو «المعاطف الثقيلة» التى تُعد من السمات المميزة لهذه السوق، أو كما يطلق عليها الباعة «دفا الغلابة». أما زبائن هذه السوق فهم معروفون يقصدونها، ويأتون إليها فى بداية فصل الشتاء من كل عام، بعضهم من منظمى الملاجئ وأديرة الأيتام والجمعيات الخيرية، والنوع الثانى من زبائنها هم أطفال الشوارع الذين يرون أن هذه السوق بمثابة «طوق نجاة» لهم من برودة الجو ومطر الليل فى الشوارع، والفئة الثالثة تتمثل فى بعض الحرفيين، وعمال «الفاعل» كما يطلُق عليهم بالمدينة، وغالباً يستخدمون تلك الملابس، أثناء عملهم سواء فى نقل مواد البناء أو حمل الأثاث وتوصيله للمنازل.وعن مصادر الحصول على الملابس المستعملة بالأسواق يقول محمود محمد حسن: «اللبس المستعمل بنحصل عليه من خلال طريقتين الأولى عن طريق (البالة) فى جمرك الميناء والطريقة دى فى الغالب مش بنلجأ لها، لأنها بتكون غالية، ومن غير تنقية، والبالة بتكون جاية من أى دولة أوروبية، وبتنزل فى الجمرك، وبيشتريها التجار على بعضها، وبيتراوح سعرها بين 50 - 120 ألف جنيه، عشان كده بياخدها اصحاب المحلات، أما الطريقة التانية طريقة على قد إيدينا، وسعرها بيكون معقول من خلال بعض باعة (الروبابيكيا) الذين يحصلون على الملابس المستعملة من المنازل، وبنشترى منهم البيعة على بعضها ب 200 جنيه».يروى محمد فتوح، بائع روبابيكيا، طريقة تجميعه تلك الملابس، قبل توصيلها لسوق المستعمل، ويقول: «روبابيكيا دى كلمة السر فى شغلى، يعنى أسمع أى بيت بيقول الكلمة دى أطلع عليه على طول تعطى لى ربة المنزل بعض ملابس الأسرة المستعملة وانا اديها بدلها (كروانة) بلاستيك أو أدوات مطبخ أو منظفات، يعنى الفكرة كلها قايمة على تبادل السلع مش الفلوس، وبعد كده أنقى اللبس الكويس من اللبس الممزق، واعبيهم فى قماشة كبيرة ودى اللى بيسموها (البيعة) بلغة سوق المستعمل، وأعرضها على الباعة فى السوق».أما عن أسعار الملابس فى سوق المستعمل فتقول فاطمة محمد، إحدى الزبائن: «أنا زبونة دايمة باجى أشترى من هنا كل شتاء، لأن الدنيا غالية، واحنا ناس على قد حالنا، وبشترى الجاكيت الجلد من هنا ب20 جنيه، وأى جاكيت سواء كتان أو قطن بيتراوح سعره من 15 إلى 30 جنيه أعلى سعر، أما البنطلون بيكون سعره بين 10 و25، والقمصان والبلوفرات من 3 إلى 10 جنيه بس، وانا عندى أطفال كتير ومقدرش اشترى جديد يعنى لو مشترتش من هنا يموتوا من البرد».