إيه أكتر حاجة كانت مستفزة فى رمضان السنة دى؟

ممدوح جبريل - مدير معرض
سلوك الناس أكتر شىء مستفز بصراحة فى شهر رمضان السنة دى، سب وشتيمة تسمعها طول ما انت فى الطريق وفى إشارات المرور والمشكلة ممكن أن تحس إن مافيش صيام خالص أو إن خلاص السب والشتيمة بقت لغة تفاهم بين الناس، وأنا شايف إن المشكلة دى خلت مافيش إحساس مختلف عند الناس بشهر رمضان.
صلاح الدين عبدالمنعم - مدير مبيعات
موضوع الحج والعمرة ده كان أكتر حاجة مستفزة فى شهر رمضان بسبب الفلوس اللى الناس دفعتها لشركات السياحة علشان الناس تطلع عمرة، والمشكلة إن مافيش حسم من الأول سابوا الشركات تاخد فلوس من الناس وبعد كده طلعت قرارات جديدة، طيب الحكومة كانت فين من الأول، والمسألة استمرت ليه طالما عارفين إن الموضوع خطر للدرجة دى.
محمد سيد - طالب
الحبيبة بتوع الكورنيش ده أكتر حاجة مستفزة فى شهر رمضان، الناس تبقى صايمة ورايحة وجاية من شغلها ومصالحها، ودول واقفين على الكورنيش، مافيش أى مشكلة بالنسبة لهم، والمشكلة أنك ممكن تلاقى البنات دول لابسين حجاب وإسدال وواقفين بالمنظر ده.
بسنت مجدى - صحفية
أكوام الزبالة فى الشوارع دى أكتر حاجة مستفزة فى شهر رمضان السنة دى، وبصراحة الزبالة خلت منظر الشوارع فى مصر شيئا لا يطاق والمشكلة أن الناس بتقول إن المشكلة مسئولية الحكومة مع إن المشكلة أساسا سلوك فردى من الناس، يعنى ممكن تبقى ماشى فى شارع وتشوف كيس زبالة طاير من بلكونة ولاّ شباك.. طيب الحكومة هنا ذنبها إيه؟.
صلاح جاد - مقاول
الأسعار السنة دى كانت غالية جدا بشكل مبالغ فيه، والمشكلة إن قبل رمضان الحكومة قالت إن الأسعار هاترخص وحددت مجموعة من السلع بالاسم، بس الكلام ده مش بيتنفذ خالص، وبصراحة مافيش رقابة على الأسواق والمشكلة إن دوامة الأسعار فيها مصاريف العيد وبعدها مصاريف المدارس، أما المشاكل التانية زى الزحمة فى الشوارع والمواصلات دى حاجات خلاص اتعودنا عليها.
سيد عبدالله - نجار
التليفزيون هو أكتر حاجة كانت مستفزة فى رمضان السنة دى، المسلسلات عددها كبير قوى أكتر من اللازم، وكلها مركزة على موضوعات الجنس، وملابس الممثلات فيها ماكانتش محترمة، يعنى هدوم بصراحة ماينفعش تكون فى التليفزيون فى الأيام العادية.