أشهر النكت عن الشيطان!

سياسة ونسوان وصعايدة ومحششين وطلبة وحكام عرب

فى العادى لما حد بيعمل حاجة شريرة أو حاجة ذكية أوى بنقوله: (آه يا ابن الأبالسة) وده رد فعل طبيعى على اعتبار أن إبليس هو أبو الشر، ولكن ليه لما حد يلعب كورة حلوة أو يقول نكتة جامدة أو يحل مسألة صعبة برضه بنقول له: (آه يا ابن الأبالسة)؟! الحقيقة مش عارف، يمكن عشان إبليس مرادف لثقافة العفرتة، ولا ده معناه اعتراف إنسانى بذكاء إبليس وتفوقه الحيلى والخططى، عموما زى ما إبليس تصدر شباك تذاكر الشر والكوابيس، هتلاقيه بينافس بقوة على شباك تذاكر الكوميدى والدم الخفيف بعدما أصبح عنصرا رئيسيا فى أغلب النكت اللى بتتقال فى الوطن العربى، والغريب إن النكت اللى شيطان بطل فيها بتسخر من البشر مش من الشيطان، بمعنى أن الشيطان رمز الشر والحيل دائما فى هذه النكت ما يكون أضعف منا خططيا وأقل شرا من بنى البشر، أو أنه طول الوقت بيتعجب من شرور بنى البشر اللى فاقت شروره فهو دائما خاسر فى كل النكت إذا دخل فى منافسة مع امرأة تريد أن تثبت أنها أكثر مكرا منه أو فى حوار مع رئيس عربى يريد أن يثبت أنه أكثر شراسة وشرا من إبليس.
يعنى الموضوع باختصار إن المصريين كالعادة قرروا أن يستخدموا إبليس على طريقة شر البلية ما يضحك .. أهو بالمرة يمسخروه ويهزأوا منه، وبالمرة يضعوا كل من يقوم ببطولة نكتة مع الشيطان فى صف الأبالسة، فى السطور اللى جاية هتلاقى أشهر نكت شارك إبليس فى بطولتها.. حاول تضحك وبعدين استعيذ بالله من الشيطان الرجيم
1 - كان ياما كان فيه حاكم لقى فانوس سحرى قام دعكه فطلعله منه إبليس
قاله : شبيك لبيك تطلب إيه؟
قاله الحاكم: بص بقى يا عم إبليس أنا عملت فى الشعب بتاعى كل حاجة.. قوللى بقى على حاجة جديدة أعملها عشان أخليه يبطل كلام عن الحرية.
إبليس قاله: بس كده.. بسيطة.. هات ودنك.. وش وش وش وش وش.
قام الحاكم قاله: إيه ياعم لعب العيال ده.. ده كلام برضه، يا عم أنت شكلك كده إبليس نص كمّ ، لا ليك فى العفرته ولا حاجة..هات ودنك بقى أقولك أنا بأعمل إيه فى الشعب بتاعى.. وش وش وش وش وش.
قام إبليس وشه اصفرّ وقاله: يا راجل اتّقى الله.
2 - مرة واحد صعيدى كان عاوز ياكل مش، فراح جاب بلاص مش أكل أول طبق ودخل فى التانى ودخل فى الثالث والرابع وقال آه أنا نسيت اسمى (نسيت أقول بسم الله الرحمن الرحيم ) ودخل فى خامس طبق وقال أنا نسيت اسمى (نسيت أقول بسم الله الرحمن الرحيم) راح إبليس طلعله وقال سمى يا ابن العبيطة قلبى اتحرق.
3 - إبليس عرف إن رمضان داخل.. فقعد يغنى رجب حوش صحبك عنى.
4 - مرة واحد داخل الحمام فقال أعوذ بالله من الخبث والخبائث فقاله الشيطان يا عم اعمل وانت ساكت.
5 - صومالى لبسه شيطان.. الشيطان مات من الجوع.
6 - مرة شيطان ندل عزم شوية شياطين أصحابه ودخلهم أوضة وقفل عليهم وشغل لهم القرآن وطلع يجرى!
7 - قام الشيطان إمبارح الصبح ولم كل متعلقاته وسايب البلد وماشى الناس كلها جريت وراه سيبنا ورايح فين يا شيطان هتلاقى ناس زينا فين كدابين ومنافقين وحرامية..
رد الشيطان وقال.. أنا بخلى الواحد يسرق ويبقى من الأغنياء وبخلى الواحد يغش ويبقى من الكبار والواحد يزور فى الانتخابات ويدخل مجلس الشعب وبكبر الناس لحد رئيس الجمهورية وفى الآخر أدخل على أى حد فيهم ألاقيهم معلقين يفطة كبيرة مكتوب عليها.. هذا من فضل ربى.. وعوزنى أرجع؟
8 - محشش سمع إن الشيطان شاطر راح يدرس معاه.
9 - اجتمع 5 شياطين على واحد غبى شيطان وسوس له و4 بيفهموا فيه.
10 - إيهود باراك - وجورج دبليو بوش -وأبو مازن.
ماتو أثناء اجتماع سلام.. المهم دخلوا كلهم الجحيم.
إيهود باراك قال: وحشتنى إسرائيل وعايز أكلمهم واطّمن الصهاينة عاملين إيه هناك.. اتصل بيهم واتكلم حوالى خمس دقايق.. وقال: ها إبليس.. عايز كام تمن المكالمة؟
إبليس قاله: خمسة مليون دولار.. وكتبله شيك ورجع قعد على كرسيه فى الجحيم تانى.
جورج بوش غار منه جدا وقعد يصرخ وهو بيقول: وأنا كمان عايز اكلّم أمريكا واتّصل وقعد يتكلم حوالى دقيقتين وبعدين قال: ها إبليس عايز منى كام تمن المكالمة؟
إبليس قاله: عشرة مليون دولار وكتبله شيك ورجع يقعد على كرسيه فى الجحيم تانى.
أبو مازن غار منهم أكتر وبدأ يصرخ بهستريا ويقول: أنا كمان عايز أكلم السلطة الفلسطينية عاوز أشوف عملوا إيه وأوباما عمل سلام وريح شعبى ولا هوه ونتنياهو عمالين يعملوا اجتماعات وبس زى إلى كنا بنعملها؟
وعايز أعرف الناس فى غزة عاملين إيه هناك ماتوا ولا لسه وعايز اكلّم الوزراء وعايز اكلم كل واحد.. المهم اتصل وقعد يتكلم.. يتكلم.. يتكلم.. حوالى كدا 20 ساعة وبعدين قال: ها أخى حبيبى إباليسو عايز منى كام تمن المكالمة؟
إبليس قال: دولار واحد
فرد أبومازن وقاله: إيش.. دولار واحد بس؟
إبليس رد عليه وقال: أيوه من الجحيم للجحيم مكالمة محلية.
11 - إبليس راح يزور شارون وهو مريض، شاروون فرح قوى لما شاف إبليس وبدا يصحى من الغيبوبة، إبليس طلع وقاله: بحياة أبوك إوعى تموت لأنه شياطينى حالفة يمين تسلم وتسيب جهنم لو دخلتها.
12 واحدة ست بتقول لجوزها ياريتنى كنت اتجوزت إبليس قالها هو فى حد برضه يتجوز أخته ده حرام.
13 - فى مرة أم بتحكى لابنها أى شىء بيوقع منك على الأرض لحسو الشيطان فمرة طلع مع ستو فرجع على البيت قالت أمه: وين ستك قال: مش انتى قلتيلى أى شىء يوقع على الأرض لحسو الشيطان.