على سلم وزارة العدل

معقول فى العدل على السلم الناس تتسحر على تمره!
ووزير العدل بيتفرج وشايفهم بالعين الحمره!
مرسال واتنين خبطوا بابه ويقول للمرسال فوت بكره
ازاى العدل هايتحقق ووزيره بيتهرب بره؟
فى مارينا راح زارها وصيف وقعد فى هواها واتكيف
والناس من شهرين بتهاتى لا سمعهم ولا شاف بالمره
.....
أمال العدل هنلقاه فين لما وزيره أسبوع واتنين
مظاليم على بابه بتتعذب واقفين بولادهم من شهرين
ولا حد نظر فى ملفاتهم ولا حد سألهم ليه واقفين
ولا لجنة سياسات سألتهم ولا سألت باب العدل منين
ويقولوا مصر هاتتقدم والمصرى بيبات ع السلم
خبراء من أعلى المستوايات بعد الريس راح يشكوا لمين
.....
مجلس للشعب بيعمل أيه صفوت وسرور فايدتهم أيه
ونظيف وشهاب قافلين الباب والناس شهرين بتدق عليه
قولوا لأحمد عز اتحرك فز رجال سياساتك ساكتين ليه؟
مشغول بحديد وبفكر جديد والناس شايفه المر على إيديه!
والشرطه واقفه بعربيات جاهزه بعصايه وكلبشات
والبلد اترهنت للبشاوات والظلم ركب وفرد رجليه
.....
مش ممكن مصر هاتتقدم لا بفكر قديم ولا فكر جديد
وزراء حكومتنا مش فاضيين فيها كل وزير عن شغله بعيد
فيه واحد شغلاه مستشفى والتانى بيتاجر فى حديد
والثالث عنده متين محلج والرابع عايز ماله يزيد
والناس على لقمه بتتسابق والرزق شحيح واللقمه بعيد
.....
لا تقولى بكره ولا بعده ولا بعد سنين راح تتقدم
طول ما انت اسير ديكتاتوريه ووزير فى الحكم بيتعلم
ووزير بيسوقك بالكرباج لو شافك حتى بتتكلم
ووزير مشغول بفلوس ونفوذ وحيتان فى التورته بتقسم
وأنا وإنت كمان دايما ساكتين راضيين بالعيشه مذله وطين
هاتطول واقفتنا فى مظاهرات وتطول قاعدتنا على السلم