عايزة أحكى حكاية بينوكيو عارف بينوكيو؟ بينوكيو الجميل الرفيع فى حواديت زمان؟ فاكره وهو بيجرى ويلعب فاكر ركبه وهى تخبّط واوعى اوعى تقول لى كانت تخبط على باب جيران بينوكيو الخشب فاكر قصصه وكل حكاياته دى كانت تحفة.. كانت جنان أنا فاكره شكله وهو بيجرى وفاكره أبوه اللى عمله خشب عمله خشب عمله وفاكره هيقعد ويسكت أراجوز عبيط فاكر إنه عشان بس ركّب خشب ودق فى خشبه مسامير خشب خلاص اشتراه!!! بينوكيو زهق ولما هرب فى ليلة شجاعة خاف وارتعش من قلة هدومه وخطف البرد أمنه ونومه ما هو يا سيدى فى أصله خشب ومين فى الدنيا أهبل يلبّس خشب يدفّى خشب مين فينا عمره حس بلعبة وحس إن فيها قلب وحياة بينوكيو هرب وراح جنب بيت منور فى عتمة راح جنب نار قايدة.. نفسه فى دفا خشبه اتلسع وكان هيبقى فى ثانية رماد لولا اندفع بينوكيو رجع محنى الجبين خايف من البرد ومن كل حاجة ساعات باحس بينوكيو.. أنا ولما حس بنفسه خشب خاف واترعب نفسه يكون مش خشب مش خشب بينوكيو كان مخنوق م الألم وأصبح شقى أصبح هروبه شىء اعتيادى وكدبه كمان اعتيادى وعادى يكدب وأخته تقول له خليك مؤدب الكدب عيب فيه ناس بتكدب ورجليها تقصر وناس تانية تكدب ومناخيرها تطول امسك نفسك عن الكدب حبة وحبة فى حبة هتبقى حقيقى زيى حقيقى ويموت الخشب بينوكيو.. أنا أكدب وأكدب ومناخيرى تطول بينوكيو بيكدب كتير غصب عنه شايف دنيا بعيدة وجميلة نفسه يكون كل حاجة ينول كل حاجة يعيش كل حاجة ويلعب ويلعب نفسه يبطل خوف م النيران وما يبقاش خشب وينسى إنه يكدب ويكدب ومناخيره تطول ساعات وساعات بينوكيو أنا بينوكيو أنا عارف نهاية كل حكاية؟ خليك معايا ألملم فى نفسى وأنا بس باختم علشان النهاية.. غبية النهاية بينوكيو مات سمع الكلام وقع واتكسر وقام من ضلوعه ولد مش شقى ولد مش بيكدب ولد مش بيبكى ويشكى ويلعب ولد مولود برجلين قصيرة ومناخير طويلة ولد اعتيادى وعادى.. عادى عرفت بينوكيو؟ افتكرت الحكاية؟ بينوكيو.. بينوكيو الأراجوز الخشب أنا بينوكيو وبينوكيو أنا
