خلص الحوار ما بينا وماخلصتش الحكاية

كله ع الفصول من ذكريات الطفولة
اجرى نلحق مكان ف الصفوف الأولى
ضحكت وسألته .. بتكلمنى ؟؟؟
قالى أيوه .. أنا صاحبك ف سنة أولى
لفت بينا السنين وفضلنا اتنين صحاب
أخويا من أم تانية لكن من نفس التراب
ضحك ولعب وجد وأيام بتعدى
وحيطان عليها عبارة .. للذكرى الهباب
أيام الصبا عدت مدفونة ف حوش مدرسة
وأيام شبابنا ضحكت للى وصل سنها
جامعة وكلية واحدة .. وحلم بيجمعنا
بيقولوا حنبقى دكاترة لما نخرج منها
فيلم أبيض وأسود وكاتب بيكتب دراما
بداية ونهاية سعيدة والحشو كله ملامة
بطلة بتخون بطل وحادثة بشعة وضحية
عمر السعادة قصير وهى دى العلامة
قام يغسل إيديه من بعد عيشى وملحى
من بعد سنين المحبة جاله قلب يجرحنى
بيقول لى أنى ضده خارج عن عقيدته
وكلام كتير ماسخ كأنه قاصد يدبحنى
يابنى إحنا بنتناقش بلاش أرجوك غباوة
لا أنا ماسك لك سيف ولا بينى وبينك عداوة
اسمع كلامى كويس وأرجوك فتح عينيك
مناقشة الرأى واجب لكن بالهداوة
ماقولتش أنى صح ولا قُلت عليك مغفل
كل اللى قلته رأى .. شايف أنه الأفضل
اختلف معاك جايز لكن عليك لأ
اختلافنا مش خلاف لأنه اختلاف عقل
واقف يتفرج عليا .. مستغرب أنى بعافر
يابنى رد عليا ولا انت كنت مسافر
بيضرب كف على كف وبصوت عال بيقولى
مالكش عندى رد .. صديقى الكافر
قالوا لك عليا كافر .. وببساطة صدقتهم
يعرفونى أكتر منك .. عشان تسمع لهم؟
يقولوا زى ما يقولوا ولا يفرق معايا
اللى يهمنى أشوفك مابتتكلمش زيهم
خلص الحوار ما بينا وماخلصتش الحكاية
حكاية اتنين صحاب عرفتوا منها البداية
ولسه الزمن بيدور والاختلاف خلاف
آسف مش حاكمل .. أصلى ماعرفش النهاية